قاراعاندىلىق تۇلەكتى شەتەلدىڭ جەتى جوعارى وقۋ ورنى شاقىردى
جاس جىگىت ءوز ءومىرىن IT- تەحنولوگيالارمەن بايلانىستىرماق، دەپ حابارلايدى قازاقپارات ءتىلشىسى.
اديحان تۇيشييەۆ 18 جاستا. بيىل ول NIS- ءتى ءبىتىرىپ، بىردەن بىرنەشە شەتەلدىك ۋنيۆەرسيتەتتەرگە ەمتيحان تاپسىرعان.
«ماعان امەريكادان، سينگاپۋردان، ۆەنگريادان، گەرمانيادان جانە باسقا ەلدەردەن شاقىرتۋ جىبەرىلدى. مەن گەرمانياداعى Jacobs University Bremen- ءدى تاڭدادىم، ويتكەنى ول ماعان تولىق گرانت بەردى. بۇل حالىقارالىق وقۋ ورنى، وندا بۇكىل الەمنىڭ ستۋدەنتتەرى وقيدى. ولار اعىلشىن تىلىندە ساباق بەرەدى»، - دەيدى اديحان.
بولاشاق ستۋدەنت ناقتى عىلىمداردا دا، IT- باعىتتا دا جەتىك. ول كوپتەگەن وبلىستىق جانە رەسپۋبليكالىق وليمپيادالاردىڭ، كونكۋرستاردىڭ جۇلدەگەرى. سونداي- اق، اديحان سپورتپەن شۇعىلدانادى جانە كوپ وقيدى. وعان ۇ ب ت- دا 140 بالدان 137 بالل جيناۋعا تابيعي قىزىعۋشىلىق پەن قاجىرلى ەڭبەگى كومەكتەسكەنىن ايتادى.
ول مەكتەپتى «التىن بەلگىگە» بىتىرگەن. «ماعان ءبىلىم بەرگەن ۇستازدارىما ريزامىن. ولار ماعان كوپ نارسەنى ۇيرەتتى، بويىمداعى قاسيەتتەرىمدى اشتى. مەن دارىندى بالالار ءۇشىن بارلىق جاعداي جاسالعان NIS- تە وقىعانىما قۋانىشتىمىن. ءبىزدىڭ مەكتەپتە وقۋشىلاردى شابىتتاندىراتىن جانە ىنتالاندىراتىن ەرەكشە ەنەرگەتيكا بار»، - دەدى تۇلەك.
گەرمانيادا جوعارى ءبىلىم العاننان كەيىن اديحان قازاقستاندا جۇمىس ىستەۋدى جوسپارلاپ وتىر.