قازاقستان رەسەيمەن بارلىق باعىتتار بويىنشا ستراتەگيالىق سەرىكتەستىكتى دامىتۋعا نيەتتى - ءاليحان سمايىلوۆ
بۇل تۋرالى ق ر پرەمەر-ءمينيسترى ءاليحان سمايىلوۆ ەكاتەرينبۋرگ قالاسىندا XII «يننوپروم» حالىقارالىق ونەركاسىپتىك كورمەسى اياسىندا ر ف ۇكىمەتىنىڭ ءتوراعاسى ميحايل ميشۋستينمەن كەزدەسۋىندە ايتتى، دەپ حابارلايدى قازاقپارات ۇكىمەتتىڭ رەسمي سايتىنا سىلتەمە جاساپ.
كەزدەسۋ بارىسىندا ق ر پرەمەر-ءمينيسترى بيىل ءبىزدىڭ ەل «يننوپروم» كورمەسىنىڭ سەرىكتەسى، وسىعان بايلانىستى قازاقستان تاراپىنان مەملەكەتتىك سەكتور مەن بيزنەس-قوعامداستىق وكىلدەرىنەن قۇرالعان رەسمي دەلەگاتسيا كەلىپ وتىرعانىن ايتتى.
«ءبىزدىڭ كومپانيالار وزدەرىنىڭ ازىرلەمەلەرىن كورسەتۋ، ءتيىمدى جانە پەرسپەكتيۆالى ىسكەرلىك بايلانىستار ورناتۋ ءۇشىن بەرىلگەن مۇمكىندىكتى تولىق كولەمدە پايدالانادى دەپ سانايمىن»، - دەدى ءاليحان سمايىلوۆ.
پرەمەر-مينيستر قازاقستان مەن رەسەي اراسىنداعى ءوزارا مەملەكەتارالىق بايلانىستار جوعارى دەڭگەيدە ەكەنىن اتاپ ءوتتى.
ەكىجاقتى قارىم-قاتىناستىڭ ەرەكشە سيپاتى مەملەكەتتەر باسشىلارى كەزدەسۋلەرىنىڭ جوعارى قارقىنىمەن دە راستالىپ وتىر.
«قازاقستان ۇكىمەتى ەكونوميكالىق ىنتىماقتاستىقتى تەرەڭدەتۋگە باعىتتالعان ءوزارا ءىس-قيمىلدىڭ بارلىق باعىتتارى بويىنشا بەلسەندى ديالوگقا دايىن»، - دەپ اتاپ ءوتتى ءاليحان سمايىلوۆ.
رەسەي - قازاقستاننىڭ نەگىزگى ساۋدا-ەكونوميكالىق سەرىكتەسى. 2021-جىلدىڭ قورىتىندىسى بويىنشا ەكىجاقتى تاۋار اينالىمى ۇشتەن بىرگە ءوسىپ، $24,2 ميللياردقا جەتتى. بۇل - قازاقستان- رەسەي ساۋداسى ءۇشىن رەكوردتىق كورسەتكىش. وسى جىلى وڭ ديناميكا ساقتالىپ وتىر - قاڭتار- مامىر ايلارىندا ءوزارا ساۋدا %5 عا ءوسىپ، $9,2 ميللياردقا جەتتى. «ەلدەرىمىز اراسىنداعى كوپجوسپارلى ەكونوميكالىق بايلانىستاردى دامىتۋ بويىنشا جۇيەلى جۇمىس جۇرگىزىلىپ جاتىر. ەكىجاقتى ءوزارا ءىس-قيمىلدىڭ جانە ساۋدا اينالىمىن ۇلعايتۋدىڭ كەڭ اۋقىمدى ماسەلەلەرىن شەشۋدە قازاقستان-رەسەي ۇكىمەتارالىق كوميسسياسى ەرەكشە ءرول اتقارادى. بۇل تۇرعىدا ەكونوميكالىق ىنتىماقتاستىقتىڭ 2021-2025-جىلدارعا ارنالعان كەشەندى باعدارلاماسىن ۋاقتىلى ىسكە اسىرۋ ماڭىزدى»، - دەدى ق ر ۇكىمەتىنىڭ باسشىسى.
ءاليحان سمايىلوۆ ونەركاسىپتىك كووپەراتسيا قازاقستان مەن رەسەي ىنتىماقتاستىعىنىڭ باسىم باعىتتارىنىڭ ءبىرى ەكەنىن ايتتى.
وسىلايشا، ونەركاسىپ سالاسىنداعى بىرلەسكەن كۇش-جىگەردىڭ ناتيجەسىندە $437,8 ميلليونعا 13 ءىرى كووپەراتسيالىق جوبا جانە $3 ميللياردقا 9 جاڭا جوبا ىسكە اسىرىلدى.
«بۇل جۇمىستىڭ تيىمدىلىگىن تومەندەتپەۋ ماڭىزدى. قازاقستان ۇكىمەتى بارلىق باعىتتار بويىنشا قازاقستان-رەسەي ستراتەگيالىق ارىپتەستىگىنىڭ سەرپىندى دامۋىن قامتاماسىز ەتۋ ءۇشىن كوپ جوسپارلى جۇمىستى جالعاستىرۋعا نيەتتى»، - دەپ تۇيىندەدى ق ر پرەمەر-ءمينيسترى.
ءوز سوزىندە ميحايل ميشۋستين رەسەي ۇكىمەتىنىڭ قازاقستانمەن دوستىق پەن ارىپتەستىكتى ودان ءارى نىعايتۋدى ءسوزسىز باسىمدىق رەتىندە قاراستىراتىنىن اتاپ ءوتتى.
«ءبىزدىڭ ىنتىماقتاستىق ۋاقىتپەن تەكسەرىلگەن جانە سىرتقى سىناقتارعا توزىمدىلىگىن بىرنەشە رەت دالەلدەگەن»، - دەدى م. ميشۋستين. كەزدەسۋ بارىسىندا ۇكىمەت باسشىلارى كەڭ اۋقىمدى ماسەلەلەردى، ونىڭ ىشىندە ساۋدا-ەكونوميكالىق، كولىك جانە گۋمانيتارلىق سالالارداعى ىنتىماقتاستىق ماسەلەلەرىن تالقىلادى.