ۇلت ۇستازى احمەت بايتۇرسىن ۇلىنىڭ ەسىمى اۋەجايعا بەرىلدى
بۇل تۋرالى ۇكىمەت قاۋلىسى جاريالاندى، دەپ حابارلايدى قازاقپارات ءتىلشىسى.
قوستاناي وبلىستىق مادەنيەت باسقارماسىنىڭ باسشىسى ەرلان قالماقوۆ اتالعان باستامانى ۇلت ۇستازىنىڭ 150 جىلدىق مەرەيتويى قارساڭىندا اۋەجاي ۇجىمى كوتەرگەنىن ايتتى.
«بيىلعى احمەت بايتۇرسىن ۇلىنىڭ مەرەيتويى اياسىندا رەسپۋبليكالىق جانە وبلىستىق جوسپارلار بار. بۇگىندە كوپتەگەن ءىس-شارالار اتقارىلىپ جاتىر. سونىڭ ءبىر ماڭىزدىسى - قوستاناي قالاسىنداعى حالىقارالىق اۋەجايعا احمەت بايتۇرسىن ۇلىنىڭ ەسىمىن بەرۋ تۋرالى شەشىم. بۇل باستامانى كوتەرگەن - اۋەجايدىڭ ۇجىمى. ودان بولەك وسى ۇسىنىستى قوعام بەلسەندىلەرى، زيالى قاۋىم وكىلدەرى ءتۇرلى جەرلەردە ايتىپ ءجۇردى. سوندىقتان ول ۇجىمنىڭ تالقىسىنا سالىنىپ، قولداۋ تاۋىپ، ءتيىستى راسىمدەردەن وتكىزىلدى. ەندى ادىلەت ورگاندارىنا قۇجات رەسمي تىركەلگەننەن كەيىن حالىقارالىق اۋەجايعا احمەت بايتۇرسىن ۇلىنىڭ ەسىمى بەرىلەتىن بولادى»، - دەدى باسقارما باسشىسى.
ەرلان قالماقوۆتىڭ ايتۋىنشا، قوستاناي قالاسىندا ورنالاسقان بىرنەشە مەكتەپ ۇجىمى وقۋ ورداسىنا احمەت بايتۇرسىن ۇلىنىڭ ەسىمىن بەرۋ ۇسىنىسىن جاساعان. ازىرگە بۇل باستامالار زەردەلەنۋدە.
اۆتور: ءاليحان اسقار