قازاق تىلىندەگى ءسوزجاسامعا ەرەكشە ءمان بەرۋ قاجەت - شەرۋباي قۇرمانباي ۇلى
فيلولوگيا عىلىمدارىنىڭ دوكتورى شەرۋباي قۇرمانباي ۇلى وسىلاي دەيدى. عالىمنىڭ ايتۋىنشا، جاڭا جاسالىپ جاتقان سوزدەردىڭ اسىرەسە تەرميندەردىڭ ساپاسى، جاسالۋ ادىستەرى مەن تالاپتارىنا كوڭىل ءبولۋ ماڭىزدى، دەپ حابارلايدى «حابار 24».
ەۋرازيا ۇلتتىق ۋنيۆەرسيتەتىندە «ءتىل ءبىلىمى جانە ءسوزجاسام ماسەلەلەرى» اتتى حالىقارالىق عىلىمي- تاجىريبەلىك كونفەرەنسيادا ءوتتى. سالا ماماندارى مەن عالىمدار قازاق تىلىندەگى سوزدەردىڭ قازىرگى جاي- كۇيى مەن تەرمين ماسەلەلەرىن ورتاعا سالدى. فيلولوگيا عىلىمدارىنىڭ دوكتورى كارىمبەك قۇرماناليەۆتىڭ «قازاق تىلىندەگى ءسوزجاسام ۇياسى: تەوريا جانە پراكتيكا» اتتى كىتابى دا تانىستىرىلدى.
«ءسوزجاسام ماسەلەسى دە قازىرگى ءتىل ءبىلىمىنىڭ وزەكتى ماسەلەلەرىنىڭ ءبىرى. ويتكەنى ءتىل دامۋىمەن بىرگە ءتىلدىڭ لەكسيكالىق قورى دا دامىپ، جاڭا سوزدەر پايدا بولىپ، بار سوزدەر ەسكىرىپ جاتاتىنى تابيعي قۇبىلىس. سول جاڭا جاسالىپ جاتقان سوزدەردىڭ اسىرەسە تەرميندەردىڭ ساپاسى، جاسالۋ ادىستەرى، ولارعا قانداي تالاپ قويىلادى، ونىڭ كەم- كەتىكتەرىن انىقتاۋ بۇل توقتاۋسىز ءجۇرىپ جاتاتىن جۇيەلى جۇمىس»، دەيدى فيلولوگيا عىلىمىنىڭ دوكتورى شەرۋباي قۇرمانباي ۇلى .