كەزىندە دىنمۇحامەد قونايەۆتىڭ جەكە دارىگەرى بولعان تانىمال دوكتور احات مۇلىكوۆ 83 جاسقا اياق باسسا دا، جاس بۋىن ارىپتەستەرىنىڭ قاتارىنان قالماي، انەستەزيولوگيا- رەانيماتولوگيا سالاسىندا ەڭبەك ەتىپ كەلەدى. مەديتسينا قىزمەتكەرلەرى كۇنى قارساڭىندا كاسىبي مامان قونايەۆتىڭ جەكە دارىگەرى رەتىندە 20 جىل بويى قالاي جۇمىس ىستەگەنىن ەسكە الدى، دەپ جازادى Sputnik قازاقستان.
احات ءامين ۇلى ەڭبەك جولىن سىزعانوۆ باسقارعان قازاق كسر دەنساۋلىق ساقتاۋ مينيسترلىگىنە قاراستى كلينيكالىق جانە ەكسپەريمەنتتىك حيرۋرگيا ينستيتۋتىنىڭ انەستەزيولوگيا- رەانيماتولوگيا بولىمىندە باستاعان. 1974 -جىلى تامىز ايىندا احات مۇلىكوۆ قازاقستان كومپارتياسى ورتالىق كوميتەتىنىڭ ءبىرىنشى حاتشىسى دىنمۇحامەد قونايەۆتىڭ جەكە دارىگەرى بولىپ بەكىتىلگەن. دارىگەر سول كەزدە وزىنە اسا ۇلكەن جاۋاپكەرشىلىك جۇكتەلگەنىن ايتادى.
«شىنىمدى ايتسام، قاتتى قوبالجىدىم. ءبىراق وزىمە جانە جۇمىسىما سەنىمدى بولدىم. سول كەزدە ك س ر و 4-باس باسقارماسىنىڭ باستىعى ەۆگەني چازوۆتىڭ «سەن بۇل جەردە بىرەۋدىڭ قول استىندا جۇرەتىن دوكتور رەتىندە ەمەس، دارىگەر رەتىندە كەلىپ وتىرسىڭ. ەگەر وڭالتۋ ءساتتى وتسە، ءبىرىنشى باسشى ارى قاراي جۇمىسىن ىستەي بەرەدى، بولماسا، زەينەتكە كەتەدى!« دەپ ايتقانى بار. ينستيتۋت ديرەكتورى الەكساندر سىزعانوۆ تا ءوز تىلەگىن ايتقان. «بۇل كىسىنى ءبارى سىيلايدى، جاقسى كورەدى، ينستيتۋتىمىزدى جەرگە قاراتپا!«، - دەدى ول. ءسويتىپ، ول كىسى 82 جاسقا دەيىن ءومىر ءسۇردى.
مەن 20 جىل بويى ونىڭ قىر سوڭىنان قالماي ءجۇردىم. ونى قىزمەتتەن الىپ تاستاپ، ءتيىستى كومەكتى بەرمەسە دە، وعان كەڭەس بەرىپ، ۇيىندە تەگىن ەم- دوم جاسادىم. تىركەلگەن ەمحاناعا بارمادى. ءالى ەسىمدە، ستوماتولوگيالىق كرەسلونى دا اكەلىپ جۇردىك. دىنمۇحامەد احمەت ۇلى قايتىس بولعان كۇنى دە جانىندا بولدىم. ءبىراق قۇتقارا المادىم. جۇرەگى ابدەن شارشادى. الدىندا مۇحامەدجان تىنىشپايەۆتىڭ مەرەيتويىنا باردى. بارماي- اق قويىڭىز دەسەم دە، بولمادى.
»مەن بارماسام، قازاق باتىرىن كىم ەسكە الادى« دەيتىن. وسىنداي ادام بولدى. ەشكىمدى ۇمىتپادى، بارىنە الاڭداپ ءجۇردى»، - دەپ ەسكە الادى احات مۇلىكوۆ.
دارىگەردىڭ سوزىنشە، قونايەۆ گورباچيەۆتىڭ تۇسىندا قاتتى ۋايىمعا سالىنعان. «كسرو باسشىسى قىزمەتىنەن كەتكەن قونايەۆتى سىناي باستادى، «كۋنايەۆشينا« كەزىندە توقىراۋ بولدى» دەپ شىقتى. الايدا قازاقستان بارلىق كورسەتكىش بويىنشا ءۇشىنشى ورىندا تۇرعان. سوعان قاراماستان، جەرگىلىكتى ادامدار ونى قولدامادى، گورباچەۆتىڭ ايتقانىن ءىلىپ اكەتتى. سول ءۇشىن قاتتى ۋايىمدادى«، - دەيدى ول.
قونايەۆ قىزمەتىنەن كەتكەننەن كەيىن احات مۇلىكوۆ قايتادان ءوزى ىستەگەن كلينيكالىق اۋرۋحانانىڭ جانساقتاۋ بولىمىنە جۇمىسقا كەلگەن. سودان بەرى اتتان تۇسپەگەن. «70 جاسىمدا زەينەتكە جىبەرگىسى كەلدى. بارلىق جەتىستىگىمدى ەسەپتەسەك، 28 مىڭ تەڭگە شىعىپ تۇر ەكەن. سودان قىزمەتىمدى جالعاستىردىم. جۇمىسىڭدى جاقسى كورسەڭ جانە ءبىلىپ تۇرساڭ، جاقسى عوي، راقاتتانىپ ىستەيسىڭ«، - دەيدى دارىگەر.