ۇكىمەت باسشىسى ەڭ تومەن جالاقىنى قاي سالانىڭ ماماندارى الاتىنىن ايتتى

نۇر-سۇلتان. قازاقپارات - قازاقستاندىقتاردىڭ كوبى ەڭبەك ونىمدىلىگى تومەن سالالاردا قىزمەت ەتىپ ءجۇر.

مۇنداي مالىمەتتى ق ر پرەمەر-ءمينيسترى ءاليحان سمايىلوۆ ءماجىلىس دەپۋتاتتارىنىڭ ساۋالىنا بەرگەن جاۋابىندا كەلتىردى، دەپ حابارلايدى قازاقپارات ءتىلشىسى.

«بۇگىنگى تاڭدا جۇمىسپەن قامتىلعان حالىقتىڭ كوبى اۋىل شارۋاشىلىعى مەن قىزمەت كورسەتۋ سياقتى ونىمدىلىگى تومەن سالالاردا جۇمىس ىستەيدى. مۇنى ەلدە ەڭبەك ونىمدىلىگى تومەن، ايلىق از تولەۋگە بولاتىن جۇمىس ورىندارى اشىلىپ جاتقانىمەن بايلانىستىرۋعا بولادى»، - دەپ جازدى ۇكىمەت باسشىسى ءوز جاۋابىندا.

ونىڭ ايتۋىنشا، ەلدىڭ ەكونوميكاسىنداعى ەڭبەك ونىمدىلىگى 1 ادامعا شاققاندا 8,2 ميلليون تەڭگە بولىپ وتىر. ءبىراق اۋىل شارۋاشىلىعىندا بۇل كورسەتكىش 3,3 ميلليون تەڭگە، قىزمەت كورسەتۋ سالاسىندا 6,8 ميلليون تەڭگە بولىپ تۇر. ال قايتا وڭدەۋ سالاسىندا 1 ادامعا شاققانداعى ەڭبەك ونىمدىلىگى 19,5 ميلليون تەڭگەگە جەتكەن.

«ايلىقتىڭ تومەن بولۋىنا جۇمىس كۇشىنىڭ بىلىكتىلىگى تومەن بولۋى اسەر ەتۋدە. وسىعان بايلانىستى جۇمىس كۇشىنىڭ ونىمدىلىك قابىلەتىن ارتتىرۋ شارالارى ىسكە اسىرىلادى. ال ول ءۇشىن ونىمدىلىگى جوعارى جۇمىس ورىندارىن كوپتەپ اشىپ، وڭدەۋشى سالانى جاڭا تەحنولوگيالاردى يگەرۋگە ىنتالاندىرۋ قاجەت. ونىڭ اسەرىنەن بىرنەشە تىزبەككە سوزىلىپ، بىرنەشە سالانى قاتار دامىتادى. سونىڭ ارقاسىندا ارالاس سالالار دامىپ، يمپورت الماستىرۋ، ءوندىرىستى تسيفرلاندىرۋ جانە اۆتوماتتاندىرۋ شارالارى جەدەلدەيدى»، - دەيدى ءاليحان سمايىلوۆ.

سوڭعى مالىمەت بويىنشا، قازاقستان وتباسىلارى تابىستارىنىڭ 50 پايىزىن ازىق-تۇلىككە، ونىڭ ىشىندە 46 پايىزىن تاماق ساتىپ الۋعا جۇمسايدى.

اۆتور: ەسىمجان ناقتىباي