رەپرەسسيا: «اسا قۇپيا» تاڭباسى بار قۇجاتتار الماتىدا فوتوكورمەگە قويىلدى

الماتى. قازاقپارات - الماتىدا ساياسي قۋعىن- سۇرگىن تۋرالى «اسا قۇپيا» تاڭباسىمەن ساقتالىپ كەلگەن ماتەريالدار فوتوكورمەگە قويىلدى، دەپ حابارلايدى قازاقپارات ءتىلشىسى.

الماتى قالاسىندا 1920-1950 -جىلدارداعى ساياسي قۋعىن- سۇرگىن قۇرباندارىن ەسكە الۋعا ارنالعان «ءبىز» اتتى فوتوكورمە اشىلدى. ەكسپوزيتسيالىق ماتەريالدار رەتىندە قۇقىق قورعاۋ ورگاندارىنا تۇلعانى انىقتاۋ جانە تانۋ ماقساتىندا سول كەزدەگى جەكە ىستەردەن الىنعان قۋعىن- سۇرگىنگە ۇشىراعان ادامداردىڭ مۇراعاتتىق فوتوقۇجاتتارى قويىلدى.

«فوتوكورمەدەگى ماتەريالدار 70 -جىل بويى «اسا قۇپيا» بولىپ كەلدى. قازىر سول ماتەريالدار قولىمىزدا. ۋاقىت وتە كەلە سارعايعان مۇراعاتتىق قۇجاتتار ءبىزدىڭ ەلىمىز ءۇشىن شىن مانىندە ۇلكەن تاريحي قۇندىلىق»، - دەيدى فوتوكورمەنىڭ كۋراتورى ءاليا بولاتحان. كورمەگە مۇراعاتتا ساقتالعان 300-دەن استام فوتوسۋرەت قويىلدى.

«ۇلتتىق تاريحىمىزدىڭ قيىن كەزەڭىنە اينالعان ەلىمىزدىڭ وتكەنىنە كوز جۇگىرتە وتىرىپ، ءبىز بۇگىنگى كۇنىمىزدە بار نارسەنى باعالاي ءبىلۋدىڭ، تاۋەلسىز قازاقستاندى ساقتاۋ مەن دامىتۋ ءۇشىن قاتەلىكتەردى قايتالاماۋ كەرەكتىگىن تۇسىنەمىز. ەگەر ءسىز زالدى ارالايتىن بولساڭىز، بۇل ادامداردىڭ قۇقىعى قالاي شەكتەلگەنىن تۇسىنەسىز»، - دەپ ءتۇسىندىردى ءاليا بولاتحان.

كورمە 1-شىلدەگە دەيىن Almaty Gallery عيماراتىندا وتەدى.