«قازاقستان وسى ينتەگراتسيالىق بىرلەستىكتەردە ءوزىنىڭ قىزمەتىن ۇستانادى. قازاقستان ەۋرازيالىق ەكونوميكالىق وداققا، ۇجىمدىق قاۋىپسىزدىك تۋرالى شارت ۇيىمىنا قاتىستى سالقىندىق تانىتىپ وتىر جانە وسى ۇيىمداردان شىعادى دەگەن قاۋەسەتتەر شىندىققا جاناسپايدى. ۇ ق ش ۇ- عا توقتالساق، ماسكەۋدەگى سوزىمدە قازاقستانعا شەكتەۋلى كونتينگەنتتى جىبەرۋ ارقىلى ۇ ق ش ۇ 30 جىلدىڭ ىشىندە العاش ءوزىن كورسەتكەنىن ايتقان ەدىم. اتاپ ايتقاندا، بۇل كونتينگەنتتى رەسەي ەمەس، ۇجىمدىق قاۋىپسىزدىك تۋرالى شارت ۇيىمى جىبەردى»، - دەدى قاسىم- جومارت توقايەۆ رەسەيلىك جۋرناليست اندرەي كوندراشوۆقا بەرگەن سۇحباتىندا.
وسى ورايدا مەملەكەت باسشىسى رەسەيدە كەيبىر ادامدار بۇل جاعدايدى بۇرمالاپ جۇرگەنىن، ياعني ولار رەسەي قازاقستاندى قۇتقاردى، ەندى قازاقستان رەسەيگە قارىزدار دەگەن جاڭساق پىكىر ايتىپ جۇرگەنىن سىنعا الدى. مۇنداي قاۋەسەت مۇلدەم شىندىققا جاناسپايدى.
«ءدال وسى ۇ ق ش ۇ- دا قازاقستان بەلسەندى قاتىسۋشى رەتىندە كورىنىپ وتىر. ال بۇرىندارى بۇل ۇيىم سامميتەردى وتكىزۋمەن، دەكلاراتسيالارعا قول قويۋمەن اينالىسىپ جۇرگەن ەدى. ەندى ۇيىم ءوزىن ايتارلىقتاي ءتيىمدى جاعىنان كورسەتە الدى. باسقا جاعىنان الىپ قاراعاندا، بۇل جاعدايعا ساياسي استار بەرۋگە، سونداي- اق قىسىر اڭگىمەگە اينالدىرۋعا بولمايدى»، - دەدى مەملەكەت باسشىسى.
اۆتور: رۋسلان عابباسوۆ