«الەۋمەتتىك جەلىدە سىزگە قاتىستى ءبىراز سىني پىكىر ايتىلىپ جاتىر. ءوزى بىردە-ءبىر عىلىمي جۇمىس جازباعان ادام قالاي عىلىم سالاسىن باسقارادى دەگەن پىكىر بار. ءوزىڭىزدى وسى قىزمەتتى، وسى لاۋازىمدى اتقارۋعا لايىقتىمىن دەپ سانايسىز با؟»، - دەپ سۇراق قويدى تىلشىلەر ۇكىمەتتىڭ كۋلۋارىندا.
«بىرىنشىدەن، مەنىڭ بىرنەشە مونوگارفيالارىم بار، عىلىمي جۋرنالداردا سوڭعى 4-5 جىلدا جاريالانعان ماقالالارىم بار. ولاردى اسا قاتتى جارنامالاماعان ەدىم، ءبىراق ەندى بەلسەندى جاريالايتىن بولامىن. «زەرتتەۋشىلەر» ءسال قازبالاپ كورۋى كەرەك»، - دەپ جاۋاپ بەردى ساياسات نۇربەك.
سونىمەن بىرگە، عىلىم ءمينيسترى ءوزىنىڭ بۇل قىزمەتكە لايىقتى، لايىقتى ەمەس ەكەنىن ساياسي باسشىلىق باعالايتىنىن ايتتى.
«ەكىنشىدەن، ءيا، مەن اكادەميك ەمەسپىن، رەكتور دا بولعان جوقپىن. ءبىر جاعىنان ول دا دۇرىس شىعار. نەگە دەسەڭىز، قازىرگى مينيسترلىكتىڭ نەگىزى ماقساتى - جۇيەلى تۇردە عىلىم مەن جوعارى ءبىلىم سالاسىن جەتىلدىرۋ. مەن ەل اعالارىمەن تىكەلەي قىزمەتتە بولعان جوقپىن، بەيتاراپ، وبەكتيۆتى تۇردە جۇيەلى، عىلىمي جانە تەحنيكالىق ساياساتتى ەنگىزۋگە جەتكىلىكتى قۇزىرەتىم مەن ءبىلىمىم بار دەپ سانايمىن»، - دەدى ساياسات نۇربەك.
بۇعان دەيىن عىلىم ءمينيسترى وتباسىنىڭ كيپردەن ورالىپ، بالالارىنىڭ قازاقستانداعى قاتارداعى مەكتەپكە باراتىنىن ايتقان ەدى. سونداي-اق، بۇگىن ۇكىمەت وتىرىسىندا عىلىم جانە جوعارى ءبىلىم ءمينيسترى لاۋازىمىنا تاعايىندالعان ساياسات نۇربەك سالتاناتتى تۇردە انت بەردى.
سونىمەن بىرگە، ساياسات نۇربەك اسحات ايماعامبەتوۆتىڭ ساپاسىز ءبىلىم بەرەتىن جوعارعى وقۋ ورىندارىنان تازالاۋ جۇمىسى جالعاساتىنىن ايتتى.