بۇگىندە تۇركىستانداعى تاريحي نىسانعا قاتىستى كوپتەگەن اڭگىمەلەر ايتىلىپ جاتىر. ماسەلەنىڭ ءمانىسىن «ازىرەت سۇلتان» قورىق مۇراجايىنىڭ ديرەكتورى ماۋلەن سادىقبەكتەن سۇرادىق.
«ءبىز بارلىعىنا تەك بولجام دەڭگەيىندە عانا قاراي الامىز. سەبەبى، عىلىمي تۇرعىدان ناقتى نەگىز بولماعاندىقتان تۇشىمدى جاۋاپ ايتا المايمىز. ول ءۇشىن سوڭعى ۇلگىدەگى قوندىرعىلاردى ورناتىپ، كەسەنەنىڭ اۋا اينالىمىن، جەراستى سۋ دەڭگەيىن جانە سۋ ارنالارىن جىل ون ەكى اي بويى باقىلاۋعا الىپ وتىرۋىمىز قاجەت. بۇگىندە مەملەكەت اينالاسىن اباتتاندىرىپ، قىرۋار جۇمىس جۇرگىزىپ جاتىر. ال، كەسەنەگە كەلگەندە ونى زەرتتەپ قاداعالاپ وتىراتىن قوندىرعىلار جوق. سوندىقتان عالىمدار دا ەشقانداي نەگىزگە سۇيەنىپ، جاعدايدىڭ ناقتى كورىنىسىن ايتا الماي وتىر. بىلايشا ايتقاندا «دياگنوز» دۇرىس قويىلۋى كەرەك. ءبىز سول دياگنوزدى قويا الماي وتىرمىز»، - دەيدى ماۋلەن جارىلقاسىن ۇلى.
دەگەنمەن، عيماراتقا كىرەبەرىس پەن مەشىت بولمەسى، اسحانا جانە قازاندىقتىڭ توبەسى سۋلانا باستاعان. تۇزى شىعىپ، قۇزدانعان جەرلەر دە بار. ونىڭ بارشاسى كوزگە كورىنىپ تۇر.
«كەسەنە - بۇكىل الەمگە ماقتانا الاتىن جالعىز ەسكەرتكىشىمىز. سوندىقتان نىساندى كوزىمىزدىڭ قاراشىعىنداي ساقتاۋىمىز قاجەت. قازىر كەي قابىرعالارى قۇزدانىپ تۇر. ال، اسحانا بولمەسى، قازاندىقتىڭ توبەسى سۋلانعان. ولاردى ۋاقىتشا اعىمداعى جوندەۋدەن وتكىزۋ ءتيىمسىز. سەبەبى، اراعا ۋاقىت سالىپ، قايتادان سىنى كەتە باستايدى. جالپى كەسەنەنىڭ سالىنعانىنا 600 جىلدان استام ۋاقىت بولدى. ول ارالىقتا تۇركىستاندا اۋا رايى، جەردىڭ قاباتى، ەكولوگيا وزگەردى. مۇنىڭ بارشاسى عيماراتقا اسەر ەتەدى. سوندىقتان تۇبەگەيلى زەرتتەپ، ۇزاقمەرزىمدى باقىلاۋعا الۋىمىز قاجەت. ءتىپتى، بۇل جۇمىسپەن ارنايى عىلىمي زەرتتەۋ ينستيتۋتتارى اينالىسۋى كەرەك دەپ ويلايمىن» - دەيدى «ازىرەت سۇلتان» قورىق مۇراجايىنىڭ ديرەكتورى ماۋلەن سادىقبەك.
اۆتور: قايرات زاينيشەۆ