ءار ەلدىڭ ءتولقۇجات مۇقاباسىنىڭ ءتۇسىن تاڭداۋىندا وزىندىك سەبەپتەرى بار ەكەن. اۋەجايلارداعى ۇزىن-سونار كەزەك ءسىزدى جالىقتىرسا، بۇل مالىمەتتى ەستە ساقتايسىز دەپ ۇمىتتەنەمىز.
قىزىل پاسپورت
قىزىل مۇقاباسى بار ەڭ كوپ تارالعان ءتۇستى ك س ر و- مەن بايلانىسى بار نەمەسە قازىرگى سوتسياليستىك مەملەكەتتەر تاڭدايدى. سلوۆەنيا، قىتاي، سەربيا، رەسەي، لاتۆيا، رۋمىنيا، پولشا، گرۋزيا ازاماتتارىنىڭ قىزىل ءتولقۇجاتى بار.
حورۆاتيادان باسقا ە و مۇشەلەرى دە قويۋ قىزىل جانە قىزىل ءتولقۇجاتتاردى پايدالانادى. تۇركيا، ماكەدونيا جانە البانيا سياقتى ەۋرو وداققا كىرۋگە مۇددەلى ەلدەر دە بىرنەشە جىل بۇرىن ءتولقۇجاتتارىن قىزىلعا اۋىستىرعان. اند تاۋلارى ەلدەرى - بوليۆيا، كولۋمبيا، ەكۆادور جانە پەرۋدا دا قىزىل ءتولقۇجات بار.
كوك پاسپورت
كوك مۇقابا «جاڭا الەمدى» بىلدىرەدى. كاريب تەڭىزىنىڭ ون بەس ەلىندە وسى ءتۇستى پاسپورت بار. وڭتۇستىك امەريكا ەلدەرى - برازيليا، ارگەنتينا جانە پاراگۆاي پاسپورتتارىنىڭ كوك ءتۇسى وسى ەلدەر اراسىندا ەكونوميكالىق جانە ساياسي كەلىسىمى بار Mercosur جالپى كاسىپوداق ۇيىمىمەن بايلانىسىن بىلدىرەدى. ۆەنەسۋەلا دا وسى وداققا مۇشە، ءبىراق ونىڭ ازاماتتارىنىڭ ءتولقۇجاتتارى قىزىل تۇستە. ا ق ش ءتولقۇجاتى تەك 1976-جىلى قويۋ كوك تۇسكە اۋىستى.
جاسىل پاسپورت
ماروككو، ساۋد ارابياسى جانە پاكىستان سياقتى كوپتەگەن مۇسىلمان ەلدەرىنىڭ ءتولقۇجاتتارى جاسىل ءتۇستى. بۇل ءتۇس مۇحاممەد پايعامباردىڭ سۇيىكتى ءتۇسى بولىپ سانالادى، ول تابيعات پەن ءومىردىڭ سيمۆولى. ءبىراق، كەيبىر يسلام ءدىنىن ۇستانبايتىن مەملەكەتتەر دە جاسىل ءتۇستى پاسپورت قولدانادى. مىسالى، وڭتۇستىك كورەيا پاسپورتىنىڭ ءتۇسى - جاسىل. بۋركينا-فاسو، نيگەريا، كوت-د'يۆۋار جانە سەنەگال سياقتى باتىس افريكا ازاماتتارىنىڭ دا جاسىل ءتۇستىڭ ءارتۇرلى رەڭكتەرى بار قۇجاتى بار، بۇل ولاردىڭ ECOWAS (باتىس افريكا ەلدەرىنىڭ ەكونوميكالىق قاۋىمداستىعى) مۇشەلەرى ەكەنىن بىلدىرەدى.
قارا پاسپورت
ەڭ از تارالعان ءتولقۇجاتتار - قارا ءتۇستى پاسپورتتار. بۇل قۇجاتتى بوتسۆانا، زامبيا، بۋرۋندي، گابون، انگولا، چاد، كونگو، مالاۆي سياقتى كەيبىر افريكا ەلدەرىنىڭ ازاماتتارى پايدالانادى. بۇل ءتۇس جاڭا زەلانديانىڭ ۇلتتىق ءتۇسى بولعاندىقتان، ولاردىڭ دا پاسپورتىنىڭ ءتۇسى قارا.