ايگىلى فيزيك پەتر كاپيتسا قارا تەڭىزگە ءوزىنىڭ ارىپتەستەرىمەن دەمالىسقا بارىپتى. ولار جولدان پلاستيك قاقپاعى بار بىرنەشە بوتەلكە شاراپ ساتىپ الادى. قاقپاقتى تەك پىشاقپەن اشۋعا بولاتىن. ءبىراق فيزيكتەردىڭ ەشقايسىسىندا پىشاق جوق بولىپ شىعادى.
ابدىراپ، اشا الماي تۇرعاندا جاندارىنان شالاماس ءبىر كىسى وتەدى. فيزيكتەردىڭ ءبىرى:
- كەشىرىڭىز، بوتەلكەنى اشاتىن بىردەڭەڭىز بار ما؟ - دەيدى. ءوتىپ بارا جاتقان ماساڭداۋ كىسى توقتاپ بۇرىلىپ، جايباراقات باسىپ ولاردىڭ جانىنا كەلەدى. پلاستيك قاقپاعى بار، بوتەلكەنى اينالدىرىپ قاراپ:
- وسىنى دا پروبلەما دەپ تۇرسىزدار ما؟ كىمنىڭ قالتاسىندا وتتىق بار؟ - دەپ سۇرايدى.
ابىروي بولعاندا، عالىمداردىڭ قالتاسىنان وتتىق تابىلادى. بەيتانىس جىگىت پلاستيك قاقپاقتى قىزدىردى. ءبىراز ۋاقىتتان كەيىن قىزىپ، جۇمسارعان قاقپاق وڭاي اشىلادى. ءوز ىسىنەن ماساتتانعان بەيتانىس، فيزيكا عالىمدارىنا قاراپ:
- مەكتەپتە فيزيكانى جاقسى وقۋلارىڭىز كەرەك ەدى! - دەگەن ەكەن.
اتومنىڭ العاشقى كۆانتتىق تەورياسىن جاساۋشى نيلس بور ۇلى فيزيك قانا ەمەس، سونىمەن قاتار شەبەر سپورتشى بولعان. ول فۋتبولدا كوپتەگەن جەتىستىكتەرگە جەتكەن.
جاس كەزىندە ول دانيا قۇراماسىندا تالاي رەت ويناعان. ارينە، كوپەنگاگەندە بوردى اتاقتى فيزيكتەن گورى تالانتتى فۋتبولشى رەتىندە تانيتىن ەدى. سوندىقتان 1922 -جىلى دانيا گازەتى وقىرماندارىنا: «قۇرمەتتى جانكۇيەرلەر، ءبىزدىڭ سۇيىكتى فۋتبولشى نيلس بور نوبەل سىيلىعىنىڭ لاۋرەاتى اتاندى» دەپ حابارلاعان ەكەن.
كيبەرنەتيكانىڭ اكەسى نوربەرت ۆينەر ۇمىتشاعىمەن تانىمال ەدى.
ءبىر كۇنى ونىڭ وتباسى جاڭا مەكەن- جايعا كوشكەندە ايەلى جۇمىستان كەلگەندە اداسىپ قالماسىن دەپ ءبىر جاپىراق قاعازعا جاڭا مەكەنجايدى جازىپ، قالتاسىنا سالىپ جىبەرەدى. جولدا ول جاڭا جۇمىسى تۋرالى ويلانىپ، قالتاسىنداعى جاڭا پاتەرىنىڭ مەكەن- جايى جازىلعان قاعازدىڭ ارتقى جاعىنا فورمۋلا جازا باستايدى. ءبىراز ۋاقىتتان كەيىن ويىنىڭ قاتە ەكەنىن ءتۇسىنىپ، قاعازدى لاقتىرىپ كەتەدى.
كەشكە ول ەشتەڭە بولماعانداي ەسكى مەكەنجايىنا كەلەدى. بۇل جەردە ەشكىم تۇرمايتىنىن بىلگەن ول ابدىراپ كوشەگە شىعادى. كوشەدە ءبىر قىزعا كوزى ءتۇسىپ، وعان كەلىپ:
- سەن مەنى تانيتىن شىعارسىڭ، پروفەسسور ۆينەرمانمىن عوي. مەنىڭ وتباسىم جاقىندا كوشىپ كەتتى، ولاردىڭ قايدا كوشكەنىن بىلمەيسىڭ بە؟ - دەپ سۇرايدى.
سوندا كىشكەنتاي قىز جىميىپ:
- ءيا، بىلەمىن، اكە! انام مەكەنجايدى ۇمىتىپ كەتۋىڭىزدى ءبىلىپ، ءسىزدى اكەتۋگە مەنى جىبەردى، - دەگەن ەكەن.
ماسساگەت