ۇلتتىق بانك تەڭگە باعامىنا قاتىستى جاعداي تۇراقتانعانىن جاريالادى

نۇر-سۇلتان. قازاقپارات - مامىر ايىنان باستاپ تەڭگە باعامى تۇراقتانا باستادى.

بۇل تۋرالى ق ر ۇلتتىق بانكى ءتوراعاسىنىڭ ورىنباسارى ءاليا مولدابەكوۆا ءمالىم ەتتى، دەپ حابارلايدى قازاقپارات.

بۇگىن ەلوردادا وتكەن باسپا ءسوز ءماسليحاتىندا تىلشىلەر تەڭگەنىڭ شەتەل ۆاليۋتاسىنا قاتىستى ءبىر دەڭگەيدە نىعايۋىنا قاتىستى سۇراق قويدى. بۇل رەتتە قر ۇلتتىق بانكىنىڭ ءتوراعاسى عالىمجان ءپىرماتوۆ وسى باعىتتا ۇب ەركىن ايىرباس باعامى ساياساتىن ۇستاناتىنىن اتاپ ءوتتى.

ءوز كەزەگىندە ءاليا مولدابەكوۆا بيىلعى اقپاننان بەرى تەڭگە باعامىنىڭ قۇبىلمالىعى گەوساياسي تاۋەكەلدەر مەن جاھاندىق نارىقتاعى وزگەرىستەرگە بايلانىستى بولعانىن ايتتى.

«سوندىقتان ەركىن ايىرباس باعامى رەجيمىندە تۇرعان تەڭگەگە اتالعان جاعدايلار ىقپال ەتتى. ءبىزدىڭ ويىمىزشا، تەڭگەنىڭ ەركىن باعامى سىرتقى احۋالعا ەكونوميكامىزدىڭ ءارى نارىعىمىزدىڭ جىلدام بەيىمدەلۋىنە مۇمكىندىك بەرەدى. مامىر ايىنان باستاپ جاعداي تۇراقتاندى. بۇعان سىرتقى نارىقتارداعى احۋالدىق تۇراقتانۋى ىقپال ەتتى. قازىرگى كەزدە مۇنايدىڭ، ەنەرگيا رەسۋرستارىنىڭ باعاسى وسكەنىن بايقاپ وتىرمىز. بۇل رەسۋرستار ءبىزدىڭ ەكسپورتقا شىعاراتىن نەگىزگى تاۋارىمىز بولىپ وتىر» ، - دەدى ءا. مولدابەكوۆا. وسى ورايدا ۇب ءتوراعاسىنىڭ ورىنباسارى اتالعان تۇراقتانۋ پروتسەسىنە ەكسپورتتاۋشىلار تاراپىنان شەتەل ۆاليۋتاسىنداعى ۇسىنىستارىنىڭ ارتۋى ىقپال ەتكەنىن اتاپ ءوتتى. «سوندىقتان ۆاليۋتا نارىعىنداعى جاعداي تەڭدەستىرىلگەنىن كورىپ وتىرمىز»، - دەدى ول.

بۇدان بۇرىن حابارلانعانداي، ۇلتتىق بانك ءتوراعاسى بازالىق مولشەرلەمەنى 14 پايىز دەڭگەيىندە ساقتاۋعا قاتىستى پىكىر ءبىلدىردى. جىلدىق ماندە ينفلياتسيا مامىردا 14 پايىزعا جەتتى. سونىمەن قاتار ع. ءپىرماتوۆ وسى جىلدىڭ قورىتىندىسى بويىنشا ينفلياتسيانى 13-15 پايىز دەڭگەيىندە بولۋى مۇمكىن ەكەنىن ايتتى.

اۆتور: رۋسلان عابباسوۆ