وسى جىلدىڭ 3-ناۋرىزىندا تۇرعىندار شوشقا فەرماسى مەن مال سويۋ الاڭىنان شىققان قالدىقتاردىڭ ادام دەنساۋلىعىنا جانە تابيعي ورتاعا كەلتىرەتىن زيانى تۋرالى ايتقان. بۇدان كەيىن ش ق و ەكولوگيا دەپارتامەنتى گلۋبوكوە اۋدانىنداعى «رودنيچوك» شارۋا قوجالىعىنا تيەسىلى اتالعان فەرماعا تەكسەرۋ جۇرگىزىلەتىنىن حابارلاعان ەدى.
انىقتالعانداي، شوشقا فەرماسى 2002 -جىلدان بەرى جۇمىس ىستەپ كەلەدى. قالا اكىمدىگىنىڭ قاۋلىسىمەن شارۋا قوجالىعىنا جالپى اۋدانى 19,6 گەكتار جەر 49 جىلعا جالعا بەرىلگەن. وبلىستىق اۋىل شارۋاشىلىعى باسقارماسىنىڭ مالىمەتىنشە، فەرمادا 9770 باس شوشقا بار.
«ستەپنوە ەلدى مەكەنىندەگى شوشقا ءوسىرۋ كەشەنىنە جۇرگىزىلگەن تەكسەرۋ بارىسىندا ق ر ەكولوگيالىق كودەكسىنىڭ 320-بابى 3-تارماعى 1-تارماقشاسىنىڭ بۇزىلعانى بەلگىلى بولدى. ياعني، شوشقا كوڭى اشىق دالاعا توگىلگەن. فەرمادا قالدىقتاردى ەسەپكە الۋ دا جۇرگىزىلمەگەن. زەرتحانالىق زەرتتەۋلەر شوشقا فەرماسىنىڭ اۋماعىندا جانە ودان تىس جەرلەردە توپىراق قاباتىنىڭ امموني توبىنىڭ زياندى زاتتارىمەن لاستانعانىن كورسەتتى. فەرمادان بۇدان باسقا دا زاڭبۇزۋشىلىقتار انىقتالدى. سوعان وراي جەكە كاسىپكەر بىرنەشە باپ بويىنشا اكىمشىلىك جاۋاپقا تارتىلدى. قازىر ول 500 مىڭ تەڭگەدەن استام مولشەردە ايىپپۇل تولەدى»، - دەپ حابارلادى دەپارتامەنتتىڭ باسپا ءسوز قىزمەتى. دەپارتامەنت ماماندارى شارۋا قوجالىعىنىڭ يەسىنە زاڭبۇزۋشىلىقتاردى جويۋ بويىنشا ءىس-شارالار جوسپارىن 10 كۇن ىشىندە ازىرلەۋ قاجەتتىگى تۋرالى ۇيعارىم شىعاردى.
اۆتور: تالعاتجان مۇحامەتبەك ۇلى