«قازاقستان - گازدىڭ 3,8 تريلليون تەكشە مەتر كولەمىندەگى قورى راستالعان ەل، ونى قاۋىپسىز جانە ءتيىمدى ءوندىرىپ، ىشكى نارىقتىڭ قاجەتتىلىكتەرىنە باعىتتاۋ كەرەك. گاز ءوندىرىسىنىڭ 81 پايىزى ءۇش ءىرى جوبا، ياعني قاراشىعاناق، قاشاعان جانە تەڭىزگە تيەسىلى. جاڭا گەوساياسي جاعدايلاردا، جاڭا ترانزيتتىك الەۋەتتى دامىتۋ جانە قازاقستان رەسپۋبليكاسىنىڭ وڭىرلەرىن ودان ءارى گازداندىرۋ مۇمكىندىگىمىز بار. ءبىراق، قازىرگى ۋاقىتتا گاز سالاسى ەلەۋلى قولداۋدى، ەلەۋلى قارجىلىق ينۆەستيتسيالاردى قاجەت ەتەدى. ويتكەنى گاز تاسىمالداۋ جۇيەسىنىڭ نىساندارىن جاڭعىرتپاي ءارى كەڭەيتپەي، تۇتىنۋشىلاردى ودان ءارى گازبەن ۇزدىكسىز جابدىقتاۋ مۇمكىن ەمەس»، - دەدى س. جاركەشوۆ.
«جاقىن بولاشاقتا تاۋارلى گازدىڭ نەگىزگى وندىرۋشىلەرى رەتىندە قاشاعان، قاراشىعاناق، تەڭىزشيەۆرويل بولىپ قالادى، ولارعا تاۋارلى گاز رەسۋرستارىنىڭ جالپى كولەمىنىڭ 64 پايىزى تيەسىلى. ءوز قۇرىلىمى بويىنشا قازاقستاندا وندىرىلەتىن گاز ىلەسپە مۇناي گازى بولىپ وتىر، ول نەگىزىنەن وڭدەۋگە ينۆەستيتسيالاردى تالاپ ەتەدى»، - دەدى ەنەرگەتيكا ءمينيسترى بولات اقشولاقوۆ.
ونىڭ پايىمىنشا، جەر قويناۋىن پايدالانۋشىلاردىڭ رەسۋرستىق بازانى كەڭەيتۋگە مۇددەلىلىگىنىڭ تومەندىگىن ەسكەرە وتىرىپ، ءتيىستى ىنتالاندىرۋ شارالارى قاجەت.
«وسىعان بايلانىستى، گاز جوبالارىنا ارنالعان ىنتالاندىرۋ شارالارى ارقىلى ەلىمىزدىڭ رەسۋرستىق بازاسىن تولىقتىرۋ تۋرالى ماسەلە وزەكتى بولىپ تۇر. قازىرگى ۋاقىتتا رەسۋرستىق بازانى كەڭەيتۋ ءۇشىن قاشاعان كەن ورنىندا گاز وڭدەۋ زاۋىتىن ءۇش كەزەكپەن (1, 2 جانە 6 ميلليارد تەكشە مەتر) سالۋ بويىنشا جۇمىس جۇرگىزىلىپ جاتىر. ول 2030 -جىلعا قاراي تاۋارلى گاز كولەمىن قوسىمشا 6 ميلليارد تەكشە مەتردەن اسىرۋعا مۇمكىندىك بەرەدى»، - دەدى مينيستر.
وسى ورايدا ول 2021 -جىلعى ماۋسىم ايىنان باستاپ قۋاتى 1 ميلليارد تەكشە مەتر بولاتىن جوبانىڭ ءبىرىنشى كەزەڭى بويىنشا قۇرىلىس- مونتاجداۋ جۇمىستارى بەلسەندى تۇردە جۇرگىزىلىپ جاتقانىن ايتتى. ءبىرىنشى كەزەڭدى 2024 -جىلدىڭ باسىندا ىسكە قوسۋ ەسكەرىلگەن.
«اتالعان زاۋىتتى سالۋ قاشاعان جوباسىنىڭ 2-فازاسىن ىسكە اسىرۋ اياسىندا پىسىقتالىپ جاتىر. ول مۇناي ءوندىرىسىن تاۋلىگىنە 400 مىڭ بەررەلدەن 700 مىڭ باررەلگە دەيىن وسىرۋگە مۇمكىندىك بەرەدى. بۇعان قوسا، مينيسترلىك رەسۋرستىق بازانى كەڭەيتۋدى ىنتالاندىرۋ بويىنشا جان- جاقتى جۇمىس جۇرگىزىپ جاتىر»، - دەدى ۆەدومستۆو باسشىسى.
بۇدان بۇرىن حابارلانعانداي، ەنەرگەتيكا ءمينيسترى بولات اقشولاقوۆ 2025 -جىلعا قاراي وتاندىق گازدىڭ تاپشىلىعى بولۋى مۇمكىن ەكەنىن ايتتى. ەل ىشىندە گاز تۇتىنۋ كولەمى تۇراقتى تۇردە ءوسىپ كەلەدى.
اۆتور: رۋسلان عابباسوۆ