شەكارا قىزمەتىنىڭ مالىمەتىنشە، باتكەن اۋدانىنداعى بۇلاق-باشى دەپ اتالاتىن جەردە شەكاراشىلار «كورشى ەلدىڭ شەكاراشىلارى شارتتى شەكارا سىزىعىنان ءوتىپ كەتكەنىن» بايقاعان.
«قىرعىزستان شەكاراشىلارىنىڭ زاڭدى تالاپتارىنا قۇلاق اسپاعان تاجىك شەكاراشىلارى قىرعىز جاۋىنگەرلەرىنە وق اتتى. ەكى ەلدىڭ شەكاراشىلارى اراسىندا اتىس بولىپ، تاجىك جاعى مينومەت قولداندى. الدىن الا مالىمەت بويىنشا، قىرعىز جاعى زارداپ شەكپەدى» دەپ حابارلادى قىرعىزستان شەكارا قىزمەتى.
مالىمەتكە قاراعاندا، قىرعىزستان شەكارا قىزمەتىنىڭ ديرەكتورى مەن تاجىكستان شەكارا اسكەرىنىڭ قولباسشىسى تەلەفونمەن سويلەسىپ، اتىستى دوعارۋعا كەلىسكەن. الايدا تاجىك جاعى ءالى وق اتىپ جاتىر، دەپ مالىمدەدى قىرعىز شەكارا قىزمەتىندەگىلەر.
شەكارا قىزمەتىنىڭ مالىمەتىنشە، 3- ماۋسىمدا ساعات 13:00 دە اتىس ءالى ءجۇرىپ جاتقان. تاجىك جاعى شەكاراداعى اتىسقا قاتىستى ازىرگە مالىمەت تاراتپادى.
بۇنىڭ الدىندا ەكى ەل اراسىنداعى شەكارانىڭ 972 شاقىرىمىنىڭ 664 شاقىرىمى كەلىسىلگەنى حابارلانعان. مالىمەتتى تاجىكستان پرەزيدەنتى ەمومالي راحمون راستاعان. قىرعىزستان پرەزيدەنتى سادىر جاپاروۆ تاجىكستانمەن اراداعى شەكارا ماسەلەسى «جاقىن ارادا» شەشىلەدى دەپ مالىمدەگەن.
قىرعىزستان مەن تاجىكستان اراسىنداعى داۋلى جەرلەردە ۇنەمى قاقتىعىس بولىپ تۇرادى. 2021-جىلعى ساۋىردەگى ءىرى قارۋلى جانجال كەزىندە قوس تاراپتان ونداعان ادام قازا بولدى.
بيىل ءساۋىر ايىندا قىرعىز- تاجىك شەكاراسىندا تاعى ءبىر اتىس بولىپ، ءبىر تاجىك شەكاراشىسى وققا ۇشتى.
«ازاتتىق»