ارنايى ەكونوميكالىق ايماقتاردىڭ جۇمىسىنا تالداۋ جۇرگىزىلدى

بۇگىنگى تاڭدا قازاقستاندا 13 ارنايى ەكونوميكالىق ايماق جۇمىس ىستەيدى.

ەل وڭىرلەرىندە ءتۇرلى سالالار بويىنشا كلاستەرلەر قۇرىلعان.

جالپى، وڭدەۋ ونەركاسىبىندە 1,9 تريلليون تەڭگە سوماسىنا 297 جوبا ىسكە اسىرىلدى، سونداي-اق 209 جوبا ىسكە اسىرىلۋ ساتىسىندا.

IT، لوگيستيكا، ساۋدا، دەنساۋلىق ساقتاۋ، عىلىم جانە تۋريزم سياقتى سالالاردا 131 جوبا جۇزەگە اسىرىلعان. ەندىگى كەزەكتە سالا ماماندارى ارالاس رەجيمدە جۇمىس ىستەيتىن اۋماقتاردى ەنگىزۋدى ۇسىنىپ وتىر. ياعني، جوبا ارنايى ەكونوميكالىق ايماق قىزمەتىنىڭ باسىم تۇرلەرىنە سايكەس كەلمەيتىنىنە قاراماستان، ينۆەستور ا ە ا اۋماعىندا ورنالاسىپ، ولار ءۇشىن ينفراقۇرىلىم قولجەتىمدى بولادى.

الايدا، بۇل جاعدايدا سالىقتان بوساتۋ سياقتى جەڭىلدىكتەر بەرىلمەيدى.

جەڭىلدىكتى رەجيم جوبانىڭ الەۋمەتتىك-ەكونوميكالىق ناتيجەسىنە جانە تەحنولوگيالىق كۇردەلىلىگىنە بايلانىستى سارالانعان تۇردە ارەكەت ەتەتىن بولادى.

بۇدان باسقا، اەا باسقارۋشى كومپانيالارىنىڭ كادرلىق قۇرامىنا ەرەكشە نازار اۋدارىلاتىن بولادى.

ديرەكتورلار كەڭەسىنىڭ قۇرامىنا ينۆەستيتسيالىق جوبالاردى ىسكە اسىرۋ بويىنشا تاجىريبەسى بار تاۋەلسىز ديرەكتورلاردى ەنگىزۋ ماسەلەسى قاراستىرىلۋدا.

سونىمەن بىرگە قىزمەتكەرلەردىڭ بىلىكتىلىكتەرىن ارتتىرۋ ماقساتىندا ولاردى شەتەلدىك ارنايى ەكونوميكالىق ايماقتارعا تاعىلىمداماعا جىبەرۋ دە جوسپاردا بار.

ايتا كەتەرلىگى، ا ە ا قاتىسۋشىلارى ءۇشىن بارلىق قاجەتتى جەڭىلدىكتەر قاراستىرىلعان. ياعني، رەزيدەنتتەر كورپوراتيۆتىك، جەر جانە مۇلىك سالىعىن تولەمەيدى، سونىمەن قاتار ورنالاسقان جەر ۋچاسكەلەرىنە قاجەتتى ينفراقۇرىلىم تارتىلادى.