بۇل تۋرالى بۇگىن پرەزيدەنت قاسىم- جومارت توقايەۆ 5-ماۋسىم كۇنى وتەتىن رەفەرەندۋمعا بايلانىستى قازاقستان حالقىنا بەينەۇندەۋىندە ءمالىم ەتتى، دەپ حابارلايدى قازاقپارات ءتىلشىسى.
«ەلىمىزدىڭ تاريحىندا كونستيتۋتسياعا ەنگىزىلەتىن وزگەرىستەر العاش رەت جالپى حالىقتىق رەفەرەندۋم ارقىلى جۇزەگە اسىرىلادى. رەفەرەندۋم وتكىزۋ - قازاقستاندا دامىعان دەموكراتيالىق قوعام قۇرۋ جولىنداعى ماڭىزدى قادام. اتا زاڭعا ەنگىزىلەتىن تۇزەتۋلەر جوباسى ەلىمىزدە ءبىر اي بويى قىزۋ تالقىلاندى. ءتۇسىندىرۋ جۇمىستارى جۇرگىزىلدى. قوعامدا كونستيتۋتسيالىق رەفورماعا قاتىستى پىكىرلەر كوپ ايتىلىپ جاتىر»، - دەدى قاسىم- جومارت توقايەۆ.
وسى ورايدا مەملەكەت باسشىسى ونىڭ ەرەجەلەرى پرەزيدەنتتىڭ ارتىقشىلىقتارى مەن وكىلەتتىگىن كۇشەيتۋگە ەمەس، بيلىك تارماقتارى اراسىنداعى ۇيلەسىمدى جانە تەپە- تەڭدىك جۇيەنى نىعايتۋعا، بارلىق ازاماتتىڭ مۇددەسىن، قۇقىعى مەن ەركىندىگىن قورعاۋعا باعىتتالعانىن اتاپ ءوتتى.
«بۇكىل حالىقتىڭ كونستيتۋتسياعا ەنگىزىلەتىن وزگەرىستەرگە قاتىستى ەرىكتى تاڭداۋى جاڭا، ادىلەتتى قازاقستاننىڭ بەرىك ىرگەتاسىن قالايدى. ءبىز بىرلەسە وتىرىپ، شىن مانىندە، جاڭا قازاقستان قۇرامىز. وندا الەۋمەتتىك ادىلدىك جاڭا قوعامدىق كەلىسىمنىڭ باستى قۇندىلىعى جانە نەگىزگى وزەگى بولادى»، - دەدى پرەزيدەنت.
بۇدان بۇرىن حابارلانعانداي، مەملەكەت باسشىسى بۇل رەفەرەندۋمدا ءار ازاماتتىڭ داۋىسى ماڭىزدى ەكەنىن، ءاربىر ازامات تۇتاس ۇلتتىڭ تاعدىرىنا، ياعني تىكەلەي ءوز تاعدىرىنا وڭ ىقپال ەتە الاتىنىن اتاپ ءوتتى. بۇگىن ءتۇن ورتاسىندا رەفەرەندۋمعا قاتىستى ۇگىت- ناسيحات اياقتالادى. رەفەرەندۋمدا 11 مىڭنان استام قازاقستاندىق شەت مەملەكەتتەردە داۋىس بەرەدى.