اقتوبەدە جۇك كولىگى مەن ەكى اۆتوبۋس سوقتىعىستى

بۇگىن اقتوبە قالاسىندا جول- كولىك اپاتى بولىپ، جۇك كولىگى مەن №21 جانە №45-باعىتتاعى اۆتوبۋستار سوقتىعىستى.

«سامارا- شىمكەنت تاسجولىندا «حوۆو« ماركالى جۇك كولىگى جىلدامدىقتى باسەڭدەتپەي، №21-باعىتتاعى اۆتوبۋسقا سوقتىعىستى. سول كەزدە اۆتوبۋستا 45 جولاۋشى بولعان. №21-باعىتتاعى اۆتوبۋس قوزعالىپ، ول №45-باعىتتاعى اۆتوبۋسقا سوقتىقتى. وندا 33 جولاۋشى بولعان. جول- كولىك اپاتىنان كەيىن جەتى جولاۋشى ءتۇرلى دەنە جاراقاتىمەن جەدەل جاردەم اۋرۋحاناسىنا ءتۇستى»، - دەدى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.

بۇعان دەيىن حابارلاعانىمىزداي، اقتوبەدەگى حرومتاۋ- اققۇدىق تاسجولىندا جول- كولىك وقيعاسى بولىپ، ەكى ادام كوز جۇمدى.

الدىن الا بولجام بويىنشا، Nissan Teana اۆتوكولىگىنىڭ 24 جاستاعى جۇرگىزۋشىسى اققۇدىق اۋىلى ماڭىندا قارسى جولاققا شىعىپ كەتىپ، حرومتاۋ اۋدانىنىڭ 44 جاستاعى تۇرعىنىنىڭ باسقارۋىنداعى «ۆاز-2115» اۆتوكولىگىمەن سوقتىعىسقان. جول-كولىك وقيعاسى سالدارىنان «ۆاز-2115» اۆتوكولىگىنىڭ جۇرگىزۋشىسى مەن جولاۋشىسى وقيعا ورنىندا قازا تاپتى. ودان بولەك، Nissan Teana اۆتوكولىگىنىڭ جۇرگىزۋشىسى مەن «ۆاز-2115» اۆتوكولىگىنىڭ ءۇش جولاۋشىسى حرومتاۋ قالاسىنداعى اۋرۋحاناعا جاتقىزىلدى.

اۆتور: التىناي ساعىندىقوۆا