قىرعىزستاننىڭ باس پروكۋراتۋراسىنىڭ باسپا ءسوز قىزمەتى حابارلاعانداي، دەنساۋلىق ساقتاۋ مينيسترلىگىنىڭ باسشىلىعى كەيبىر لاۋازىمدى تۇلعالارمەن بىرگە قىرعىزستان پرەزيدەنتىنىڭ «دەنساۋلىق ساقتاۋ جۇيەسىن دامىتۋ جونىندەگى شۇعىل شارالار تۋرالى» جارلىعىنىڭ تالاپتارىن ورەسكەل بۇزىپ، اقشانى جىلىستاتۋ سحەماسىن ۇيىمداستىردى.
«ماسەلەن، 2020 -جىلعى جەلتوقساننان باستاپ 2021 -جىلدىڭ قىركۇيەگىنە دەيىن قىرعىزستان حالىقارالىق ۇيىمداردان، سونداي- اق رەسەيدەن، قىتايدان، ازەربايجاننان جانە قازاقستاننان COVID-19-بەن كۇرەس ءۇشىن وتەۋسىز گۋمانيتارلىق كومەك تۇرىندە 451560 ۆاكسينا الدى. بۇدان باسقا، قىرعىز رەسپۋبليكاسىنىڭ پرەزيدەنتى رەسەي مەن قىتاي باسشىلارىمەن گۋمانيتارلىق كومەك تۇرىندە 6 ميلليون ۆاكسينا دوزاسىن بەرۋ تۋرالى ۋاعدالاستىققا قول جەتكىزدى. سوعان قاراماستان، دەنساۋلىق ساقتاۋ ءمينيسترى ا. بەيشەناليەۆتىڭ تاپسىرماسى بويىنشا 2021 -جىلدىڭ ءساۋىر، ماۋسىم، شىلدە جانە قىركۇيەك ايلارىندا جەكە شەتەلدىك كومپانيالاردان 1 ميلليارد 581 ميلليون 474 مىڭ 315 سومعا 2 ميلليون دوزا ۆاكسينا ساتىپ الىنادى. اتالعان قارجى وففشورعا اۋدارىلدى»، - دەلىنگەن حابارلامادا.
وسىلايشا، 3 ميلليون 147640 دوزا ۆاكسينانىڭ بارىنا قاراماستان، شەنەۋنىكتەر جەكە باس پايداسى ءۇشىن تاعى 2 ميلليون 460 مىڭ ۆاكسينا دوزاسىن ساتىپ الدى. ايتا كەتەرلىگى، ساتىپ الىنعان ۆاكسينالاردىڭ 243223 دوزاسىنىڭ جارامدىلىق مەرزىمى وتكەن، قالعان دوزالاردىڭ دا ساقتاۋ مەرزىمى اياقتالۋعا جاقىن.
«ناتيجەسىندە مەملەكەتكە 1 ميلليارد 581 ميلليون 474 مىڭ 315 سوم كولەمىندە زالال كەلتىرىلدى. اتالعان فاكتى بويىنشا قىرعىزستان رەسپۋبليكاسىنىڭ باس پروكۋراتۋراسى ق ك 336-بابى («سىبايلاس جەمقورلىق» ) بويىنشا قىلمىستىق ءىس قوزعاپ، تەرگەۋ امالدارى ءجۇرىپ جاتىر»، - دەيدى ۆەدومستۆودان.