بۇل تۋرالى قازاقپارات تىلشىسىنە «ادام قۇقىعىنا ارنالعان حارتيا» قوعامدىق قورىنىڭ ديرەكتورى جەمىس تۇرماعامبەتوۆا ايتىپ بەردى.
«مەملەكەت باسشىسى قاسىم-جومارت توقايەۆتىڭ جارلىعىمەن ەلىمىزدە ءولىم جازاسىنىڭ كۇشى جويىلدى. بۇدان بولەك، قىلمىستىق كودەكس، قىلمىستىق ءىس جۇرگىزۋ كودەكسى مەن قىلمىستىق اتقارۋ كودەكستەرىنە تۇزەتۋلەر ەنگىزىلە باستادى. مەن وسىنى پرەزيدەنت توقايەۆتىڭ گۋمانيتارلىق اكتىسى جانە گۋمانيتارلىق ميسسياسى دەپ ايتار ەدىم. سونداي-اق سوڭعى جىلدارى ەلىمىزدە ءولىم جازاسى تۇرىندە جازاعا اكەلۋى مۇمكىن قىلمىستاردىڭ سانى ازايعانىن ەرەكشە اتاپ وتەر جايت. جالپى مەن 1995-جىلدان بەرى قازاقستاننىڭ ءولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتىك حاتتاماسىنا قوسىلۋ جانە ەلىمىزدە ءولىم جازاسىن جويۋ ماسەلەسىمەن اينالىسىپ كەلەمىن»، - دەدى سپيكەر.
ول سونداي-اق قازاق حالقىنىڭ تاريحىندا ءولىم جازاسى بولماعانىن ايتتى.
«حالقىمىزدا ءولىم جازاسىنىڭ ورنىنا «قۇن تولەۋ» جازاسى بولعان. مىسالى، كىسى ولتىرگەن كىنالى ادام بولسا، وعان حالقىمىز ءولىم جازاسىن كەسپەگەن. ءبىراق، سول ولتىرىلگەن كىسىنىڭ قۇنىن الگى كىنالى ادامعا تولەتكەن. وسىلايشا دانا حالقىمىز ءولىم جازاسىمەن ماسەلەنىڭ تۇبەگەيلى شەشىمىن تاپپايتىنىن جاقسى تۇسىنگەن»، - دەدى جەمىس تۇرماعامبەتوۆا.
سونىمەن قاتار «ادام قۇقىعىنا ارنالعان حارتيا» قوعامدىق قورىنىڭ ديرەكتورى قازاقستاندىقتاردى الداعى رەسپۋبليكالىق رەفەرەندۋمعا ءبىر كىسىدەي قاتىسىپ، داۋىس بەرۋگە شاقىردى.
«رەفەرەندۋمنان سوڭ زاڭىمىزعا وزگەرىستەر ەنگىزىلەدى. ول ەلىمىزدىڭ ءار ازاماتى ءۇشىن ماڭىزدى وقيعا. سوندىقتان ءاربىر ازامات ءوز ءومىرى مەن ەل تاعدىرىنا بەي-جاي قاراماي، رەفەرەندۋمعا بارىپ، ءوز داۋىسىن بەرگەنىن دۇرىس دەپ سانايمىن»، - دەدى ول.