«عىلىمدى دامىعان ەلدەرمەن بىردەي قارجىلاندىرۋ دەڭگەيىنە قول جەتكىزۋ ماقساتىندا عىلىمي- زەرتتەۋ جانە تاجىريبەلىك- كونسترۋكتورلىق جۇمىستارعا جەكە ينۆەستيتسيالاردى ىنتالاندىرۋ قاجەت. مەملەكەتتىك بيۋدجەت، جەر قويناۋىن پايدالانۋشىلار جانە ۇلتتىق كومپانيالاردىڭ قاراجاتىمەن قاتار، ءىرى جەكە سەكتور - يندۋستريالىق كورپوراتسيالار مەن باسقا دا ۇيىمدار عىلىمدى قارجىلاندىرۋدىڭ نەگىزگى كوزى بولۋى كەرەك»، - دەدى ق ر پرەزيدەنتى ۇلتتىق عىلىم اكادەمياسىنىڭ 75 جىلدىعىنا ارنالعان سالتاناتتى سەسسيادا سويلەگەن سوزىندە.
پرەزيدەنت «سامۇرىق- قازىنا» قورى جانىنان عىلىمي- تەحنولوگيالىق باستامالار ورتالىعى قۇرىلعانىن ەسكە سالدى. بۇل ورتالىق عىلىمي ازىرلەمەلەردى وندىرىسكە ەنگىزۋ ءۇشىن عىلىمي قوعامداستىقپەن جۇيەلى ىنتىماقتاستىقتا بولادى.
«جەر قويناۋىن پايدالانۋشىلاردىڭ پايدالى قازبالاردى وندىرۋگە كەتەتىن قارجىسىنىڭ 1 پايىزىن عىلىمي- زەرتتەۋ جانە تاجىريبەلىك- كونسترۋكتورلىق جۇمىستارعا اۋدارۋ جانە اۋدارىمدار مەن قاراجاتتى ءبولۋدىڭ اشىقتىعىن قامتاماسىز ەتۋ جۇمىستارى جۇرگىزىلىپ جاتىر. عىلىمي- زەرتتەۋ جانە تاجىريبەلىك- كونسترۋكتورلىق جۇمىستار مەن جاڭا عىلىمي ورتالىقتاردى قۇرۋعا جەكە ينۆەستيتسيالار ءۇشىن سالىقتىق جانە ينۆەستيتسيالىق جەڭىلدىكتەردى ارتتىراتىن كەز كەلدى دەپ ەسەپتەيمىن. عىلىمي- زەرتتەۋ جۇمىستارىنا جەرگىلىكتى اتقارۋشى ورگانداردى تارتۋ قاجەت. ولار دا عىلىمي- زەرتتەۋ جانە تاجىريبەلىك- كونسترۋكتورلىق جۇمىستاردى قارجىلاندىرا الۋى كەرەك. جەرگىلىكتى جەرلەردە عىلىم، ءبىرىنشى كەزەكتە، وبلىس ەكونوميكاسىنىڭ نازارىندا تۇرعان ماسەلەلەردى شەشۋگە باعىتتالۋعا ءتيىس»، - دەدى قاسىم- جومارت توقايەۆ.