رەسەيدەگى قازاقتاردىڭ بالالارى قازاقستانعا ساياحاتتايدى

نۇر-سۇلتان. قازاقپارات – ق ر مادەنيەت جانە سپورت ءمينيسترى داۋرەن ابايەۆ بالالار مەن جاسوسپىرىمدەر اراسىنداعى ىشكى تۋريزم جوبالارى تۋرالى ايتىپ بەردى، دەپ حابارلايدى قازاقپارات ءتىلشىسى.

«بالالار مەن جاسوسپىرىمدەر اراسىندا ىشكى ءتۋريزمدى دامىتۋ مەن ناسيحاتتاۋ بويىنشا جۇمىستار جەرگىلىكتى اتقارۋ ورگاندارىمەن بىرلەسە جۇرگىزىلۋدە. مىسالى، الماتى وبلىسىندا 300 بالانى قامتيتىن، تاۋ جانە جاياۋ ءجۇرۋ تۋريزمىنە ارنالعان «جوڭعاريا» رەسپۋبليكالىق تۋرياداسىن وتكىزۋ جوسپارلانىپ وتىر»، - دەدى د. ابايەۆ ۇكىمەت وتىرىسىندا.

سونداي-اق تۇرعىنداردىڭ دەمالىسقا جۇمسايتىن شىعىنىن ازايتۋ جانە ىشكى تۋريزمدى ناسيحاتتاۋ ماقساتىندا Kids Go Free - بالالار اۋە بيلەتىن سۋبسيديالاۋ بويىنشا مەملەكەتتىك قولداۋ شاراسى كۇشىنە ەندى.

«بيىل شىلدە ايىندا اقمولا وبلىسىندا رەسەي فەدەراتسياسىنىڭ ەتنيكالىق قازاقتارىن قۇرالعان 250-دەن اسا مەكتەپ وقۋشىسىنا ارنالعان «اينالايىن، اتامەكەن!» تۋرىن وتكىزۋ جوسپارلانىپ وتىر. جاز ايلارىندا بالالار ارحەولوگياسى بويىنشا جوبالار، «اۋىلداعى اپتا»، «Summer school» الەۋمەتتىك باستامالارى جۇزەگە اسىرىلىپ، 2000-عا جۋىق بالانى قامتۋ كوزدەلىپ وتىر»، - دەدى داۋرەن ابايەۆ. بۇعان دەيىن داۋرەن ابايەۆ بالالارعا ارنالعان مادەني جوبالاردى تانىستىرعان ەدى.