بۇل تۋرالى بۇگىن ۇكىمەت وتىرىسىندا ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ تاپسىرماسىن ىسكە اسىرۋ ماقساتىندا مينيسترلىك وڭالتۋ كومەگىن دامىتۋعا ەرەكشە كوڭىل بولەدى. بالالارعا وڭالتۋ كومەگىنىڭ قولجەتىمدىلىگى ارتتى. سوڭعى 3 جىلدا وڭالتۋ توسەكتەرى مەن ورتالىقتارىنىڭ سانى 2 ەسەگە ۇلعايدى»، - دەدى مينيستر.
ونىڭ دەرەگىنشە، 2021 -جىلى 53 مىڭنان استام بالا وڭالتۋدان ءوتتى. بۇل 2019 -جىلمەن سالىستىرعاندا 3,3 ەسە كوپ.
«ەلىمىزدە العاش رەت «ەرتە ارالاسۋ» ينستيتۋتىن ەنگىزۋ جونىندەگى ءىس- شارالار باستالدى. جىل سوڭىنا دەيىن 17 ەرتە ارالاسۋ ورتالىعى اشىلادى. وندا جىل سايىن 0 جاستان باستاپ 3 جاسقا دەيىنگى ارالىقتاعى 10 مىڭعا دەيىن بالا ەم الا الادى. «قادامدىق قولجەتىمدىلىك» قاعيداتىن ىسكە اسىرۋ اياسىندا وتكەن جىلدان باستاپ بالالاردى امبۋلاتوريالىق دەڭگەيدە وڭالتۋ ەنگىزىلدى. ناتيجەسىندە تەك قانا وسى جىلدىڭ 1-توقساندا 4,2 مىڭنان استام بالا تۇرعىلىقتى جەرى بويىنشا ەمحانالار دەڭگەيىندە مەديتسينالىق وڭالتۋدان ءوتىپ جاتىر»، - دەدى اجار عينيات.
اۆتور: مارلان جيەمباي