ۇلتتىق بانك تەڭگەنىڭ نىعايۋ سەبەبىن ءتۇسىندىردى
ۇلتتىق بانك مالىمەتىنە سايكەس، ءتول تەڭگە ءبىر ايدا %6,8 عا نىعايعان.
ساۋدا-ساتتىقتىڭ جالپى كولەمى 2,2 ميلليارد ا ق ش دوللارى بولعان كەزدە قازاقستان قور بيرجاسىنداعى ساۋدا- ساتتىقتىڭ ورتاشا كۇندىك كولەمى 115 ميلليون دوللارعا تەڭ بولعان. ۇلتتىق بانك تەڭگەنىڭ نىعايۋىنا اسەر ەتكەن بىرنەشە فاكتوردى اتادى.
«ۇلتتىق ۆاليۋتانىڭ نىعايۋىنا ءبىرقاتار فاكتور اسەر ەتتى، ونىڭ ىشىندە: ەنەرگيا تاسىمالداۋشىلاردىڭ تۇراقتى جوعارى باعاسى مەن ەكسپورتتاۋشىلاردىڭ سالىقتىق تولەمدەر كەزەڭى، جەكە تۇلعالار تاراپىنان شەتەل ۆاليۋتاسىنا سۇرانىستىڭ تومەندەۋىنە بايلانىستى نارىققا قاتىسۋشىلاردىڭ سەنتيمەنتىنىڭ وزگەرۋى، رەسەي ءرۋبلىنىڭ دە، تۇتاستاي العاندا، دامۋشى ەلدەردەگى ۆاليۋتالاردىڭ باعامى دا بار. سونىمەن قاتار ۆاليۋتا نارىعىنداعى ۇسىنىس كولەمى مامىردا، شامامەن، 598 ميلليون ا ق ش دوللارىن قۇراعان كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى ساتۋى ەسەبىنەن قولداۋ تاپتى»، - دەلىنگەن بانكتىڭ حابارلاماسىندا.