جامبىل وبلىسىندا اناسى قىزىنا ەكىنشى رەت ءومىر سىيلادى
2013 -جىلى ۇلدايدىڭ زاقىمدانعان ەكى بۇيرەگى ىستەن شىعىپ، دياليز اپپاراتىنا تاڭىلعان. سىرقاتى اسقىنعان ول ىشتەي ومىردەن كۇدەرىن دە ۇزگەن.
«ءوز بەتىممەن بويىمداعى سۇيىقتىقتى سىرتقا شىعارا المايتىن ەدىم، ونى تەك گەمودياليزدىڭ كومەگىمەن جاساۋعا بولادى. سودان سوڭ قاراقالپاقستاننان تاراز قالاسىنا كوشىپ كەلدىك. وتباسىمىزدا بەس اعايىندىمىز. اكەمىز اۋىر سىرقاتتان باقيلىق بولدى. انامىز جۇمىسسىز»، - دەيدى ۇلداي.
قىزىنىڭ احۋالى جانىنا باتقان انا جامبىل وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆكە جۇگىنەدى. ناۋقاستىڭ الەۋمەتتىك جاعدايى مەن سىرقاتىنان حاباردار بولعان تاجىريبەلى حيرۋرگ اسەت اسكەر ۇلى جەدەل شەشىم قابىلداپ، دونورلىق ترانسپلانتاتسيا باعدارلاماسىن 5-مامىردا باستاپ كەتەدى. ال دونورلىققا قىزدىڭ 56 جاستاعى اناسى كەلىسىمىن بەرگەن. 6 ساعاتقا سوزىلعان وتا ءساتتى ءوتتى. بۇيرەك الماستىرۋ وپەراتسياسىنان كەيىنگى ءبىرىنشى تاۋلىكتە اعزادا جينالعان 4 ليتر ءزار سىرتقا شىعىپ، بويجەتكەن ءوزىن الدەقايدا ءتاۋىر سەزىنگەن. تالداۋ ساراپتاماسى دا جاقسى ناتيجە كورسەتكەن.
ناۋقاستىڭ جاعدايى جاقسارعان سوڭ دارىگەرلەر ءۇشىنشى تاۋلىكتەن كەيىن پاتسيەنتتى پالاتاعا اۋىستىردى.
«وپەراتسيادان كەيىن ەسىمدى جيعاندا ماعان ەكىنشى رەت ءومىر سىيلاعان انامدى ەسكە الدىم. جاعدايى ناشارلاپ قالا ما دەپ ۋايىمدادىم. قازىر انامنىڭ دا، مەنىڭ دە جاعدايىمىز جاقسى. ون جىلدىق ازاپتى ءومىرىمدى جەڭىلدەتكەن وپەراتسيادان كەيىن كوڭىلىم تولقىپ، جىلاپ جىبەردىم. وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ بارلىق شىعىندارىمىزدى جەكە قاراجاتىنان تولەدى»، - دەيدى ۇلداي.
ايتا كەتەيىك، وڭىردە بۇيرەك فۋنكسياسى بۇزىلعان 903 پاتسيەنت ديناميكالىق باقىلاۋدا تۇر. ونىڭ ىشىندە بۇيرەگى اۋىستىرىلعان 64 ادام جانە باعدارلامالىق گەمودياليزدەگى 722 پاتسيەنت بار.
اۆتور: اسحات رايقۇل