قىلمىستىق ءىس اتىراۋ قالاسىنىڭ №2-سوتىندا قارالادى. «بيىلعى جىلدىڭ 26-مامىرىندا اتىراۋ قالاسىنىڭ №2-سوتىنا ق ر قىلمىستىق كودەكسىنىڭ 366-بابىنىڭ 3-بولىگىنىڭ 2-تارماعىمەن اتىراۋ وبلىسى اكىمىنىڭ ورىنباسارى باقىتگۇل حامەنوۆاعا، اتىراۋ وبلىسى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى اقىلبەك رىسقاليەۆكە، ق ر قىلمىستىق كودەسىنىڭ 367-بابىنىڭ 2-بولىگىمەن «ب» ج ش س-نىڭ ديرەكتورىنا قاتىستى قىلمىستىق ءىس ءتۇستى»، - دەپ ءمالىم ەتتى وبلىستىق سوتتىڭ باسپا ءسوز قىزمەتىنەن.
بۇدان بۇرىن اتىراۋ وبلىسى اكىمىنىڭ ورىنباسارى قاماۋعا الىنعان ەدى. سىبايلاس جەمقورلىققا قارسى قىزمەت ءوزىنىڭ Telegram پاراقشاسىندا ءمالىم ەتكەندەي، اتىراۋ وبلىسى اكىمىنىڭ ورىنباسارى مەن مادەنيەت، ارحيۆتەر جانە قۇجاتتاما باسقارماسىنىڭ باسشىسى پارا الۋ كۇدىگىنە ىلىنگەن.
كۇدىكتىلەر اباي ەسكەرتكىشىن جاساۋ جانە ورناتۋ بويىنشا 145 ميلليون تەڭگە سوماسىنا مەملەكەتتىك ساتىپ الۋ شارتىن جاساعانى ءۇشىن ءبىر توپ اداممەن الدىن الا ءسوز بايلاسۋ ارقىلى ج ش س باسشىسىنان 4,5 ميلليون تەڭگە سوماسىندا پارا العان. وسىعان بايلانىستى اتىراۋ وبلىسىنىڭ ارنايى تەرگەۋ سوتى ۋاقىتشا ۇستاۋ يزولياتورىندا وتىرعان وبلىس اكىمىنىڭ ورىنباسارى باقىتگۇل حامەنوۆانى ءۇيقاماققا الۋ تۋرالى سانكسيا بەردى. كەيىن ول تەرگەۋ يزولياتورىنا قامالدى.
اتىراۋ وبلىسى اكىمىنىڭ ورىنباسارىنا قاتىستى قىلمىستىق ءىس ق ر قىلمىستىق كودەكسىنىڭ 366-بابىنىڭ 2-بولىگىمەن (كوپ مولشەردە پارا الۋ) تەرگەلدى. باقىتگۇل حامەنوۆا اتىراۋ وبلىسى اكىمىنىڭ ورىنباسارى قىزمەتىن 2020 -جىلعى 13-ناۋرىزدا تاعايىندالعان بولاتىن.
اۆتور: بەك مۇستافا