قىتاي اقجارقىن تۇرلىبايدى قازاقستانعا ەكستراديتسيالاۋدان باس تارتتى

نۇر-سۇلتان. قازاقپارات – ق ر باس پروكۋراتۋراسى قىتاي تۇرمەسىندە جازاسىن وتەپ جاتقان اقجارقىن تۇرلىبايدى قازاقستانعا قايتارۋدان باس تارتىلعانىن راستادى، دەپ حابارلايدى قازاقپارات ءتىلشىسى.

«2020 -جىلدىڭ 19-قازانىندا باس پروكۋراتۋراعا سوتتى بولعان اقجارقىن تۇرلىبايدىڭ ءوزىن قازاقستانعا اۋىستىرۋ تۋرالى جازباشا ءوتىنىمى تۇسكەن بولاتىن. سول كۇنى-اق قىتاي تارابىنا ءتيىستى ساۋال جولداندى. ق ح ر ادىلەت مينيسترلىگىنىڭ 2021 -جىلعى 3-ناۋرىزداعى جاۋابىنا سايكەس، اقجارقىن تۇرلىبايدى قازاقستانعا اۋىستىرۋدان باس تارتىلعان. ونىڭ شارتتى تۇردە مەرزىمىنەن بۇرىن بوساتۋ قۇقىعىنسىز ءومىر بويىنا باس بوستاندىعىنان ايىرۋ جازاسىنا كەسىلگەنىن ەسكەرىپ، وسىندا شەشىم قابىلدانعانى ايتىلعان»، - دەپ جازىلعان باس پروكۋراتۋرانىڭ مالىمەتىندە.

دەگەنمەن، باس پروكۋراتۋرا وكىلدەرى ءالى دە بولسا ءۇمىت ۇزۋگە بولمايتىنىن مەڭزەپ وتىر. «الايدا قازاقستان تارابى تۇرلىبايدىڭ ەلگە قايتارىلۋىنان ءۇمىتىن ۇزبەيدى. قىتاي سوتى ونىڭ جازا مەرزىمىن قىسقارتىپ، ناقتى جىلداردى اتاپ بەلگىلەسە ەلگە قايتارۋ مۇمكىن بولادى»، - دەپ جازادى باس پروكۋراتۋرا ماماندارى.

ەسكە سالايىق، بيىلعى مامىر ايىندا قىتايدا ءومىر بويىنا باس بوستاندىعىنان ايىرىلعان اقجارقىن تۇرلىباي قازاقستانعا قايتارىلۋى مۇمكىن ەكەندىگىن ونىڭ ادۆوكاتى سۇڭقار نۇرماعامبەتوۆ ايتقان بولاتىن.