قازاق قىزى دجيۋ- دجيتسۋدان حالىقارالىق تۋرنيردە جەڭىمپاز اتاندى

نۇر-سۇلتان. قازاقپارات - قازاقستاندىق دانا تولەۋجان يسپانيا استاناسى مادريدتە دجيۋ-دجيتسۋدان كوك بەلبەۋلەر اراسىندا وتكەن National Pro Spain حالىقارالىق تۋرنيرىندە جەڭىمپاز اتاندى، دەپ حابارلايدى Vesti.kz.

بۇل جارىسقا الەمنىڭ 30 ەلىنەن 500 دەن استام سپورتشى قاتىسقانىن ايتا كەتەيىك. 55 كەلىدە ونەر كورسەتەتىن دانا بەكەن قىزى ءۇشىن بۇل ەكى جىلدان كەيىنگى ورالۋ بولىپ وتىر.

22 جاستاعى دانا قازىرگى تاڭدا الەمدەگى ەڭ بەلدى ءبىلىم وردالارىنىڭ ءبىرى سانالاتىن ريمدەگى «لا ساپيەنتسا» ۋنيۆەرسيتەتىندە ءبىلىم الۋدا. ال بۇل تۋرنيرگە قاتىسۋ ءۇشىن ءوزىن قالىپقا كەلتىرۋگە كۇش جۇمساپ، بىردەن بەس كەلى سالماق تۇسىرۋگە تۋرا كەلگەن ەكەن.

«بۇل تەك باسى. ارى قاراي دا جەتىستىكتەرگە جەتىپ، ەلىمنىڭ اتىن شىعارا بەرمەكپىن»، - دەپ اتاپ ءوتتى دانا.

ايتا كەتەيىك، 2019-جىلى بەكەن قىزى دانا ابۋ-دابيدە الەم چەمپيوناتى اياسىندا وتكەن اق بەلبەۋلەر اراسىنداعى فەستيۆالدا كۇمىس جۇلدە جەڭىپ العان بولاتىن.