سۇحبات بارىسىندا نازاربايەۆ كونستيتۋتسياعا تۇزەتۋلەر ەنگىزۋ بويىنشا بۇكىلحالىقتىق رەفەرەندۋمعا باراتىنىن جەتكىزدى. سونىمەن قاتار بۇل ۋاقىت تالابى بولسا جانە قوعامنىڭ ىلگەرىلەۋىنە، دەموكراتيالىق دامۋىنا ىقپال ەتسە، ءار ۇرپاقتىڭ نەگىزگى زاڭعا وزگەرىستەر ەنگىزۋگە قۇقىعى بار دەپ سانايتىنىن، مەملەكەت باسشىسى قاسىم- جومارت توقايەۆتىڭ ەلدە رەفورما جۇرگىزۋ جانە دامىتۋ جونىندەگى ءىس- قيمىلىن ودان ءارى قولداۋعا دايىن ەكەنىن ايتتى.
سونىمەن بىرگە، نازاربايەۆ قاڭتار وقيعاسى مەن تۋىستارىنىڭ ۇستالۋى تۋرالى ايتتى.
«سول كەزدە مەن ءۇشىن ءتۇرلى وسەك پەن بولجامدارعا قاراعاندا، پرەزيدەنتكە قولداۋ كورسەتۋ ماڭىزدى بولدى. مەن وعان قاۋىپسىزدىك كەڭەسىنىڭ ءتوراعاسى وكىلەتتىگىن بەردىم. پرەزيدەنتتىڭ شەشىمدەرىنىڭ ارقاسىندا وقيعا دامۋىنىڭ ەڭ ناشار نۇسقاسىنىڭ الدىن الدى»، - دەدى نازاربايەۆ ءوز سۇحباتىندا.
ەلباسى ءتيىستى قۇقىق قورعاۋ ورگاندارىنىڭ ەلدە دايىندالعان تارتىپسىزدىكتەر تۋرالى نەلىكتەن بىلمەگەنىن جانە الدىن الماعانىن انىقتاۋ كەرەگىن مالىمدەدى.
نازاربايەۆتىڭ ايتۋىنشا، تۋىستارى ونىڭ اتىن پايدالانىپ، زاڭ بۇزسا، ءتيىستى جاۋاپقا تارتىلۋى كەرەك.
«ءبىز ۇزاق ۋاقىتتان بەرى قازاقستاندا قۇقىقتىق مەملەكەت قۇرىپ جاتىرمىز. ونىڭ نەگىزگى ءپرينتسيپى - زاڭ بارلىعىنا بىردەي. ەگەر مەنىڭ تۋىستارىم مەنىڭ سىرتىمنان اتىمدى پايدالانىپ زاڭ بۇزسا، ءتيىستى جاۋاپكەرشىلىككە تارتىلادى. كىناسى سوت ارقىلى دالەلدەنۋى قاجەت. ءار ازاماتتىڭ زاڭمەن قورعالۋىنا قۇقىعى بار ەكەنىن ۇمىتپاۋى كەرەك»، - دەدى نازاربايەۆ.
نازاربايەۆ راحات اليەۆ تۋرالى دا ايتىپ ءوتتى. سوزىنشە، اليەۆتىڭ كۇيەۋ بالاسى بولۋى ونىڭ زاڭ اياسىندا جازاعا تارتىلۋىنا كەدەرگى بولماعان.
«بارلىعى راحات الييەۆتىڭ وقيعاسىن بىلەتىن شىعار. ول مەنىڭ قىزىمنىڭ كۇيەۋى ەدى. مەن ءۇشىن دە ۇلىم سياقتى بولاتىن، نەمەرەلەرىنىڭ اكەسى. ءبىراق مۇنىڭ بارلىعى ونىڭ زاڭسىز ارەكەتتەرىنە مەملەكەتتىڭ كوز جۇما قاراۋىنا نەگىز بولمادى. الايدا قاشىپ ۇلگەردى جانە ءومىرىنىڭ سوڭىنا دەيىن قاشىپ ءجۇردى»، - دەپ قوستى ول.
https://24.kz/kz