«بالا تانىمايتىن ەرەسەك ادامدارمەن سويلەسپەگەنى ءجون، بوگدە كىسى اڭگىمەگە تارتقان جاعدايدا دا وعان ءمان بەرمەۋ كەرەك. تانىمايتىن ادامدار بەرگەن ءتاتتى نەمەسە باسقا دا سىيلىقتاردى الماعانى ابزال. ەگەر بوتەن كىسى سىيلىقتى قويماي ۇسىنىپ جاتسا، وندا اتا- اناسىنا حابارلاسسىن. اتا- انالارعا ەسكەرتۋ، ەگەر ارام ويى بار ادام بالانى وڭاشاعا الىپ كەتكىسى كەلسە، ول بالانى ءارتۇرلى تاسىلمەن الداپ- اربايدى. مىسالى، ويىنشىق الىپ بەرەدى، ۇيالى تەلەفوننان جاڭا ويىن ءتۇرىن كورسەتەدى نەمەسە كۇشىك جانە مىسىقتىڭ بالاسىن كورسەتەمىن دەپ الداۋى مۇمكىن. جوعارىدا اتالعان جايتتاردىڭ الدىن الۋ ءۇشىن بالاعا تۇسىندىرگەن ءجون»، - دەدى ق ر ءى ءى م اكىمشىلىك پوليتسيا كوميتەتى باسقارماسى باسشىسىنىڭ ورىنباسارى جاسۇلان جۇمانالين اتالعان ۆەدومستۆودا وتكەن باسپا ءسوز ءماسليحاتىندا.
ءى ءى م وكىلىنىڭ كەڭەسىنشە، ەگەر جاعداي ادام جوق جەردە ورىن السا، بالا ايعايلاپ، مۇمكىندىگىنشە قارسىلىق كورسەتىپ، قاشۋعا تىرىسۋى كەرەك.
«ەگەر بالا ىزىنەن بوگدە ادامنىڭ ەرىپ، اڭدىپ كەلە جاتقانىن بايقاسا، كوپقاباتتى ءۇيدىڭ كىرەبەرىسىنە جالعىز كىرمەگەنى ابزال. دالادا تۇرا تۇرسىن نەمەسە تانىس كورشىلەرىمەن بىرگە كىرسىن. بولماسا ۇيىندەگىلەرگە حابارلاسىپ كىرەبەرىستەن كۇتىپ الۋىن سۇراسىن. ال ەگەر بالا ءۇيدىڭ كىرەبەرسىنە جالعىز كىرىپ، ارتىنان تانىمايتىن ەرەسەك ادام كىرسە، وندا ليفتىگە مىنبەگەنى دۇرىس. ەگەر قاۋىپ بايقالسا، كورشىلەردى كومەككە شاقىرسىن. ءتۇرلى قاۋىپتىڭ الدىن الۋ ءۇشىن وسى اتالعان ساقتىق شارالارى تۋرالى بالالارعا ءجيى ەسكەرتىپ وتىرۋ كەرەك»، - دەيدى ول.
اۆتور: ءالي يبرايەۆ