بۇل تۋرالى ق ر ىشكى ىستەر مينيسترلىگىنىڭ وكىلى شۇعىلا تۇرلىبەك ءمالىم ەتتى، دەپ حابارلايدى قازاقپارات ءتىلشىسى.
«جول قوزعالىسىن اۆتوماتتى قاداعالاۋدىڭ تيىمدىلىگىن ارتتىرۋ ءۇشىن ىشكى ىستەر ءمينيسترىنىڭ تاپسىرماسى بويىنشا «قورعاۋ - قاۋىپتى جۇرگىزۋشى» موبيلدىك قوسىمشاسى جاسالدى. وندا «سەرگەك» جۇيەسى كامەرالارى مەن ءى ءى م جەدەل باسقارۋ ورتالىقتارى قىزمەتىنىڭ مۇمكىندىكتەرى بىرىكتىرىلگەن. موبيلدىك قوسىمشاعا كەلىپ تۇسكەن مالىمەتتەر دەرەۋ پوليتسيا قىزمەتكەرلەرىنىڭ پلانشەتتەرىنە تۇسەدى. بۇل جول قوزعالىسىن بۇزعان اۆتوموبيلدەردى ناقتى ۋاقىت رەجيمىندە انىقتاۋعا مۇمكىندىك بەرەدى»، - دەدى شۇعىلا تۇرلىبەك مينيسترلىكتە وتكەن باسپا ءسوز ءماسليحاتىندا.
ونىڭ ايتۋىنشا، اتالعان موبيلدى قوسىمشانىڭ كومەگىمەن جالعان مەملەكەتتىك ءنومىرلى اۆتوموبيلدەردى، تەحنيكالىق بايقاۋدان وتپەگەن جانە ساقتاندىرۋ پوليسى جوق كولىك يەلەرىن انىقتاۋعا بولادى. سونداي- اق اكىمشىلىك ايىپپۇلداردى تولەمەي جۇرگەن كولىك يەلەرىن تابۋعا بولادى.
«پوليتسيا قىزمەتكەرى جۇيە ارقىلى 10 مينۋتتىڭ ىشىندە 2 نەمەسە ودان كوپ زاڭدى بۇزعان «قاۋىپتى جۇرگىزۋشى» تۋرالى اقپارات الىپ، دەرەۋ شارا قابىلدايدى. موبيلدىك قوسىمشا بيىل 19 -ساۋىردەن باستاپ شىمكەنتتە، 25- ساۋىردەن باستاپ الماتى مەن نۇر- سۇلتاندا ەنگىزىلدى. اتالعان قالالاردا جۇيە جۇمىس ىستەگەن ساتتەن باستاپ جول قوزعالىسى سالاسىندا 26 مىڭنان استام اكىمشىلىك قۇقىق بۇزۋشىلىق انىقتالدى. سونىمەن قاتار 1078 اۆتوكولىك ۇستالىپ، ايىپ تۇراعىنا جەتكىزىلدى»، - دەيدى ول.
مينيسترلىك وكىلى قازىرگى ۋاقىتتا جاڭاشىلدىقتىڭ وسكەمەن جانە اتىراۋ قالاسىندا ەنگىزىلگەنىن ايتىپ ءوتتى.
«مىسالى، نۇر- سۇلتاندا رەسەيلىك ءنومىرى بار ۆاز 2114 اۆتوكولىگى ۇستالدى، وعان 4 ميلليون تەڭگەدەن استام سوماعا ايىپپۇل سالىندى. شىمكەنت قالاسى بويىنشا شەتەلدىك تىركەۋى بار 1041 اۆتوموبيل ۇستالدى، ولار 4033 رەت جول قوزعالىسى ەرەجەسىن بۇزعان»، - دەيدى ش. تۇرلىبەك.
اۆتور: ءالي يبرايەۆ