وزبەكستاندا قانداستارعا قازاق تىلىندە تەست تاپسىرۋعا مۇمكىندىك بەرگەن

نۇر- سۇلتان. قازاقپارات – قازاقتىڭ قارا دومبىراسىمەن كۇمبىرلەتە كۇي توگىپ وتىرعان بۇل ورەندەر مەكتەپ قابىرعاسىندا ءبىلىم الىپ ءجۇر. قاناتتارى قاتايا قويماعان. ءبىراق ءتۇپ- تامىرىن بىلەدى. بولمىسىنان دومبىرا شەرتىپ ۇيرەنگەندىكتەن ۇلتتىق اسپاپتى ەرەكشە قۇرمەتتەيدى.

ۇلى اقىن ابايدىڭ ادەبيەتىنەن دە قانداستار الىستاعان جوق. ەكى ۇلتتىڭ اراسىنداعى بەرىك بايلانىس، رۋحاني دوستىقتىڭ ارقاسىندا وزبەكستاندا 361 قازاق مەكتەبى جۇمىس ىستەيدى. مادەنيەت وشاقتارىندا ۇيىرمەلەر اشىلعان.

الايدا مەملەكەت ەگەمەندىك الىپ، دەربەستىك ورناعاننان كەيىن وزبەكستانداعى قازاق جاستارىنىڭ جوعارى ءبىلىم الۋ مۇمكىندىگى ازايدى. 90-جىلداردا بۇل ەلدە انا تىلىمىزدە وقىتاتىن 500-دەن استام مەكتەپ بولسا، وسى كۇنى تورتتەن ءبىرى جابىلىپ قالدى. ۋنيۆەرسيتەتتەر قازاق مەكتەبىن بىتىرگەن بالالاردان ەمتيحاندى تەك مەملەكەتتىك تىلدە قابىلداعان. ال 2017 -جىلى بيلىكتىڭ اۋىسۋىمەن جاعداي وزگەردى. ەمتيحاندى قازاق تىلىندە تاپسىرۋعا جول اشىلدى.

سەرىك ۇسەنوۆ، رەسپۋبليكالىق قازاق مادەني ورتالىعىنىڭ ءتوراعاسى:

- وزبەكستان رەسپۋبليكاسىندا قازاق تىلىندە تەست تاپسىرۋعا ۇلكەن مۇمكىندىك بەردى. وتكەن جىلدارى 15 پروتسەنتى وقۋعا تۇسەتىن بولسا، قازىر 23 پروتسەنتكە جەتتى. ەندى بيىل 30 پروتسەنتكە بالالارىمىز جوعارى وقۋ ورنىنا كىرەدى.

جالپى وزبەكستاندا جوعارى وقۋ ورنىنا ءتۇسۋ مۇمكىندىگى كەڭەس ۇكىمەتى كەزىنەن وزگەرمەگەن. تالاپكەرلەر كەشەندى ەمتيحان تاپسىرمايدى. ءبىر عانا وقۋ ورنىن تاڭداپ، سول جەردىڭ سىناعىنان وتۋگە ءتيىس. بەرتىن كەلە مۇنداي جۇيە جەڭىلدەتىلە باستادى.

اقجول ەرنازاروۆ، ستۋدەنت:

- كوپتەگەن جاستارعا مۇمكىندىك بەرىلىپ جاتىر. سونىڭ ءبىرىن ايتاتىن بولسام، 68 بالدىق وقۋعا ءتۇسۋ جەڭىلدىگى. سونى پايدالانا وتىرىپ، ستۋدەنت اتانۋ باقىتى بۇيىردى. ءبىر ۋاقىتتا ءبىر تالاپكەر 5 جوعارى وقۋ ورنىنا تاپسىرۋعا بولادى. وسى مۇمكىندىكتىڭ ارقاسىندا ءبىزدىڭ قالادا ءتالىم الىپ جاتقان ستۋدەنتتەر كوپ.

قازاقستاندىق جوعارى ءبىلىم بەرۋ جۇيەسى ورتالىق ازيادا وزىق سانالادى. 2017 -جىلدان بەرى قازاقستان 50 مىڭنان استام وزبەكستاندىققا جوعارى ءبىلىم بەردى. سونىڭ اياسىندا وتانعا ورالعان قانداستار دا جەتەرلىك.

www.24.kz