ولاردىڭ ايتۋىنشا، مايمىل شەشەگىنە قارسى وتاندىق ۆاكسينا جاساپ شىعۋعا جارتى جىلداي ۋاقىت كەتەدى، دەپ حابارلايدى قازاقپارات حابار 24 ارناسىنا سىلتەمە جاساپ. قازىردىڭ وزىندە الەمنىڭ 14 ەلىندە 200-دەن استام ادام وسى ۆيرۋستى جۇقتىرعان. ءبىر اپتانىڭ ىشىندە ناۋقاستاردىڭ سانى ەكى ەسە ارتىپ وتىر. بۇل قاۋىپتى ۆيرۋستىڭ قازاقستانعا كەلۋى دە ىقتيمال دەيدى ماماندار.
- ءيا، مايمىل شەشەگىنىڭ قازاقستانعا كەلۋ قاۋپى جوعارى. ويتكەنى ءبىزدىڭ تۋريستەر ساۋد ارابياسىنا، تۇركياعا نەمەسە افريكا مەن وزگە دە ەلدەرگە ءجيى بارادى. سوندىقتان جامان ايتپاي جاقسى جوق. قاۋىپتى ۆيرۋس كەلە قالعان جاعدايدا ءبىز تاس ءتۇيىن دايىن بولۋىمىز كەرەك، - دەيدى بيولوگيالىق قاۋىپسىزدىك ماسەلەلەرى ع ز ي اسا قاۋىپتى ينفەكسيالار زەرتحاناسىنىڭ مەڭگەرۋشىسى لەسبەك قۇتىمبەتوۆ.
قازاق بيولوگيالىق قاۋىپسىزدىك ماسەلەلەرى عىلىمي زەرتتەۋ ينستۋتۋتىنىڭ ماماندارى كوروناۆيرۋسقا قارسى وتاندىق ۆاكسينانى ويلاپ تاپقان. ەندى مايمىل شەشەگى ماسەلەسىن ەرتەرەك قولعا الۋدى كوزدەپ وتىر. ويتكەنى دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا مايمىل شەشەك ۆيرۋسى مۋتاتسياعا ۇشىراپ، ادامنان ادامعا جۇعۋ قابىلەتىنە يە بولعان. كلينيكالىق كورىنىسى بويىنشا مايمىل شەشەگى ەرەكشە قاۋىپتى تابيعي شەشەككە وتە ۇقساس.
- ءبىزدىڭ ينستيتۋت شەشەك ۆيرۋستارىمەن كوپ جىلداردان بەرى اينالىسادى. سوندىقتان تاجىريبە جەتكىلىكتى. ماسەلەن، سيىر شەشەك جانە مايمىل شەشەك ءبىر توپ دەسەك، ولاردىڭ اراسىندا يممۋندىق انتيگەن بايلانىسى بار. سوندىقتان ءبىر ۆيرۋس باسقا ۆيرۋسقا قارسى يممۋنيتەتتى وڭاي جاساي الادى. مىسالى، سيىر ۆيرۋسىنىڭ شەشەك اۋرۋىنا قارسى يممۋنيتەتتى قۇرۋداعى بەلسەندىلىگى وتە جوعارى، - دەپ اتاپ ءوتتى عالىم.
ماماندار مايمىل شەشەگىنە قارسى ۆاكسينانى جارتى جىلدىڭ ىشىندە جاساپ شىعۋعا بولادى دەپ وتىر.
- ەگەر سيىر ۆيرۋسىنا نەگىزدەلگەن ۆاكسينا بولسا، وندا جەدەلدەتىلگەن تۇردە، ال كوۆيد-19 كەزىندەگىدەي جۇمىس ىستەسەك التى ايدا ۆاكسينانى دايىنداپ شىعۋعا بولادى. ودان كەيىن كلينيكاعا دەيىنگى جانە كلينيكالىق سىناقتار بار. ياعني دەنساۋلىق ساقتاۋ مينيسترلىگىنە دە بايلانىستى بولادى. ماسەلە ولاردىڭ بىزگە قانشالىقتى قولداۋ كورسەتۋىندە، - دەيدى عىلىمي- زەرتتەۋ ينستيتۋتىنىڭ زەرتحانا مەڭگەرۋشىسى.
دۇنيەجۇزىلىك پاندەميادان كەيىن قازاقستاننىڭ دەنساۋلىق ساقتاۋ جۇيەسى ايتارلىقتاي نىعايىپ، ەپيدەميولوگتار مەن دارىگەرلەر اسا قاۋىپتى ينفەكسيالارمەن ءتيىمدى كۇرەسۋدىڭ توتە جولدارىن تاپتى.