«ەداۋىر سابىرلى بولا باستادى»: جىلقى مالىنىڭ ەرەكشە بالالاردى ەمدەۋدە قانداي كومەگى بار

نۇر-سۇلتان. قازاقپارات - جەتى قازىنانىڭ ءبىرى - جىلقىنىڭ ادامزات ءۇشىن پايداسى وراسان زور. ادام دەنساۋلىعىنا اسەر ەتەتىن قاسيەتى دە بار.

ماسەلەن، اتىراۋدا ەرەكشە قاجەتتىلىكتەرى بار بالالار ءۇشىن يپپوتەراپيا كۋرسى اشىلعان. مامانداردىڭ ايتۋىنشا، مۇنداي ەم بالالاردىڭ دەنساۋلىعىن جاقسارتۋعا سەپتىگىن تيگىزەدى، دەپ حابارلايدى اقجايىق باسىلىمى.

يپپوتەراپيا (لات. Hippos - جىلقى، therapia - مەديتسينالىق كومەك، ەمدەۋ) - وڭالتۋ رەتىندە جىلقىمەن ەمدەيتىن دەنە شىنىقتىرۋ ءتۇرى.

الەمدىك وڭالتۋ تاجىريبەسىندە ەمدىك تۇرعىدا اتپەن ءجۇرۋ، ادامنىڭ پسيحولوگيالىق جانە فيزيولوگيالىق جاعدايىن ەسكەرۋگە مۇمكىندىك بەرەتىن وڭالتۋدىڭ كوپ فۋنكتسيونالدى ءادىسى رەتىندە قاراستىرىلادى. 2021 -جىلدىڭ شىلدە ايىنان باستاپ «بالالار - ەل بولاشاعى» قوعامدىق بىرلەستىگىنىڭ ۇيىمداستىرۋىمەن اتىراۋدا ەرەكشە قاجەتتىلىكتەرى بار 95 بالا وسى يپپوتەراپيا كۋرسىنان وتكەن. بيىل بىرلەستىك 120 بالانى وڭالتۋدى جوسپارلاپ وتىر. جوبا مەملەكەتتىڭ كومەگىمەن جۇزەگە اسىرىلۋدا.

يپپوتەراپيا كۋرسىنىڭ - سەرەبرالدى سال اۋرۋىنا، اۋتيزمگە شالدىققان، پسيحيكالىق دامۋى تەجەلگەن، سويلەۋ قابىلەتى تەجەلگەن جانە باسقا دا جۇيكە- پسيحونيەۆرولوگيالىق دياگنوزدارى بار بالالار ءۇشىن تيگىزەر پايداسى مول. نەمەرەسىنە تسەرەبرالدى سال اۋرۋى دياگنوزى قويىلعان سۆەتلانا اجەيدىڭ ايتۋىنشا، بۇرىن نەمەرەسى ءجيى دىرىلدەيتىن جانە وزدىگىنەن جۇرە المايتىن. وسى يپپوتەراپيا كۋرسىنا قاتىسقالى بەرى وڭ وزگەرىس بايقالعان.

«ساباقتان كەيىن الدەقايدا سابىرلى بولا ءتۇستى، ەندى ءبىزدىڭ كومەگىمىزبەن دە، وزدىگىمەن دە قوزعالا الادى»، - دەيدى زەينەتكەر.

تاعى ءبىر انانىڭ سوزىنشە، يپپوتەراپيا كۋرسىنان وتكەلى بەرى ۇلىنىڭ دەنساۋلىعى الدەقايدا جاقسارعان.

«بىزگە بىرنەشە دياگنوز قويىلدى - پسيحيكالىق دامۋىنىڭ تەجەلۋى، ا س ب (اۋتيزم سپەكترىنىڭ بۇزىلۋى)، مايتابان، وعان قوسا بالانىڭ ءىشى قاتىپ قالاتىن، سودان كەيىن جىلاۋىق (كيستا) انىقتالدى. وسىنىڭ سالدارىنان بالا گيپەربەلسەندى، مازاسىز. تاعايىندالعان ءدارى- دارمەكتەر بۇل بەلگىلەردى جەڭىلدەتۋگە كومەكتەسپەدى، ونىڭ ۇستىنە كيستا دياگنوزى قويىلعاننان كەيىن بىزگە بۇل پرەپاراتتاردى قابىلداۋعا مۇلدەم تىيىم سالىندى. دارىگەرلەردىڭ ءبارى ءبىراۋىزدان جۇزۋمەن، يپپوتەراپيامەن اينالىسۋعا كەڭەس بەردى. قازىر ۇلىم وڭالتۋدىڭ ەكىنشى كۋرسىنان وتۋدە، ءناجىسى قالىپقا كەلدى، ەداۋىر سابىرلى، ورنىقتى، ءار نارسەنى بىلۋگە قۇمار بولا باستادى. بۇرىن ساباقتا 10 مينۋتقا دا شىدامايتىن، قازىر جارتى ساعاتتاي ات ۇستىندە جايباراقات وتىرادى. بۇرىن جانۋارلارعا ءمان بەرمەسە، قازىر مىسىققا، يتكە جاقسى قارايدى، جىلقىنى كورگەندە ەرەكشە قۋانادى»، - دەيدى ۆەنەرا ليكەروۆا.

«بالالار - ەل بولاشاعى» قوعامدىق بىرلەستىگىنىڭ جەتەكشىسى گۇلميرا وتەپقاليەۆانىڭ ايتۋىنشا، كۋرستان ءوتۋ ءۇشىن بالاردىڭ جاسىنا كەلگەندە شەكتەۋ بار. سوندىقتان ول الداعى ۋاقىتتا جاس شەگىن كەڭەيتۋ تۋرالى ۇسىنىس جاسايتىندارىن ايتادى. سەبەبى، ەمدەۋدى جانە وڭالتۋدى نەعۇرلىم ەرتەرەك باستاسا، سوعۇرلىم ىلگەرىلەۋ ايتارلىقتاي بولاتىنىن ارىپتەستەرىنىڭ تاجىريبەسى كورسەتىپ وتىر. ودان بولەك گۇلميرا وتەپقاليەۆا نۇسقاۋشىلاردى وقىتۋ ءۇشىن اتىراۋعا وسى سالادا 10 جىلدان استام قىزمەت ەتىپ كەلە جاتقان، بالالاردى وڭالتۋدا تاجىريبەسى مول وسكەمەن ورتالىعىنىڭ ماماندارى كەلىپ، ۇيرەتىپ جاتقانىن اتاپ ءوتتى.