ول 8-قاباتتان قۇلاپ كەتۋگە شاق قالعان ءسابيدى قۇتقارىپ قالدى. ال ونىڭ ەرلىگىن تاسپاعا ءتۇسىرىپ العان ەلوردالىق تۇرعىن ءوز ەڭبەگىنىڭ ەسكەرۋسىز قالعانىن ايتۋدا.
Nege.kz ءتىلشىسى باقىت چەتەنوۆامەن سويلەسىپ، وقيعانىڭ قالاي وربىگەنىن ءوز اۋزىنان ەستىدى.
- باقىت، وقيعا قالاي بولعانىن قىسقاشا بايانداپ بەرە الاسىز با؟
- مەن قازىر دەكرەتتىك دەمالىستا وتىرعان انامىن. سول كۇنى كۇن ىستىق بولعاندىقتان تەرەزەنى اشىپ قويعانمىن. كەنەت سىرتتان كوپ ادامنىڭ ايقايلاعان داۋىسىن ەستىدىم. مەن العاش كورگەنىمدە، ءسابيت تەرەزەگە ۇمتىلىپ جاتىر ەكەن. دەرەۋ تەلەفونىما جۇگىرىپ، تاسپاعا ءتۇسىردىم. سەبەبى، ابايسىزدا بالا مەرت بولسا، ءسابيتتىڭ كىناسىزدىگىن تەك ۆيدەومەن دالەلدەۋگە بولادى دەپ ويلادىم. ابىروي بولعاندا، ءبۇلدىرشىن امان قالدى.
ۆيدەونى لەزدە، كورشىلەردىڭ الەۋمەتتىك جەلىدەگى پاراقشاسىنا جىبەردىم. سوسىن بارلىعىمىز سىرتقا شىقتىق. ءسۇت ءپىسىرىم ۋاقىتتا مەن تۇسىرگەن ۆيدەو قوعامدىق رەزونانستىڭ تۋۋىنا سەبەپكەر بولدى. ءسابيت پەن ساعيدىڭ ءۇيلى بولۋىنا سول ۆيدەونىڭ سەپتىگى ءتيدى دەپ ويلايمىن.
- ەكى ازامات ماراپاتتالىپ، ءۇيلى بولىپ جاتىر. ەگەر ءسىز ۆيدەوتاسپاعا ءتۇسىرىپ الماعاندا ەرلىكتەرى ەلەڭبەي قالۋى دا مۇمكىن ەدى عوي.. .
- ءيا. ءبىزدىڭ قازاقستاندا ەرلىك كورسەتكەن كوپ باتىردىڭ ءىسى كورىنبەي قالىپ جاتىر عوي. جانىپ جاتقان ورتتەن امان الىپ شىققان، سۋعا اعىپ بارا جاتقان بالانى قۇتقارعان جاندار تۋرالى الەۋمەتتىك جەلىدەن ءجيى وقىپ ءجۇرمىز. ءبىراق سول باتىرلاردىڭ بارلىعى ءدال وسىلاي ءۇيلى بولىپ جاتقان جوق. سوندىقتان، مەن تۇسىرگەن ۆيدەونىڭ سەپتىگى كوپ بولدى دەپ ايتا الامىن. سول ۆيدەو بولماعاندا، ءسابيت پەن ساعيدىڭ ەرلىگى ەلەۋسىز قالاتىن ەدى.
- ەڭبەگىم ەسكەرۋسىز قالدى دەپ وكپەلەگەن جوقسىز با؟
- ولار كوپتىڭ قولىنان كەلە بەرمەيتىن ناعىز ەرلىك ىستەدى. ءسابيت ءۇشىن دە، ساعي ءۇشىن دە وتە قۋانىشتىمىن. ءسابيتتىڭ ءۇيلى بولعانىنان حاباردار بولعان سوڭ، قۇتتىقتايىن دەپ حابارلاستىم. تۇتقاسىن كوتەرمەدى. ۆاتسابىنا حابارلاما جازعان ەدىم. وقىدى، ءبىراق جاۋاپ قايتارمادى. «ۆيدەوعا تۇسىرگەنىڭىز ءۇشىن راقمەت!» دەسە بولدى عوي. ماعان ەشكىم العىس ايتپادى.
ءتىپتى الەۋمەتتىك جەلىدە كوپ حالىق «وسى وقيعا ۆيدەوعا ءتۇسىپ قالماعاندا ساعي مەن ءسابيتتىڭ ەرلىگى ەلەۋسىز قالاتىن ەدى» دەپ جازىپ جاتىر ەكەن. مەن دە سولاي ويلايمىن. سول ۆيدەو ءتىپتى بريتانيا، كورەيا، ا ق ش سياقتى ەلدەرگە دە تاراپ كەتىپتى. بارلىق تەلەارنا سول ۆيدەومەن سيۋجەت جاسادى. ءبىراق مەنى اۆتور رەتىندە كورسەتپەگەن. تەك ءبىر عانا سايت سىياقى بەرىپ، ۆيدەونىڭ اۆتورى رەتىندە مەنىڭ ەسىمىمدى جازىپ جاريالادى.
- ءوزىڭىز تۋرالى ايتىڭىزشى. نەشە بالاڭىز بار؟
- شۇكىر، جولداسىم جانە ءۇش قىزىم بار. ءتورتىنشى ءسابيىمىزدى كۇتىپ ءجۇرمىز. ۇلكەن قىزىم ءتورتىنشى سىنىپتا وقيدى، كىشى قىزىمىز 3 جاستا. بىرەۋدەن ىلگەرى، بىرەۋدەن كەيىن عۇمىر كەشىپ جاتىرمىز.