نۇر-سۇلتان قالالىق پوليتسيا دەپارتامەنتىنىڭ مالىمەتىنشە، بۇرىن ءىستى بولعان 36 جاستاعى ەر ادام ەلوردادا تۇراتىن زەينەتكەردىڭ قالالىق تەلەفون نومىرىنە قوڭىراۋ سوققان. قاسكۇنەم الدىمەن ايەل داۋىسىمەن سويلەپ، زەينەتكەرگە قىزى ەكەندىگىن ايتقان.
ءوزىن جولدا پوليتسەيلەر توقتاتىپ، جىبەرمەي جاتقانىن جەتكىزگەن. وسىدان كەيىن ءوز داۋىسىمەن پوليتسيا قىزمەتكەرى رولىنە كىرىپ، قىزىنىڭ ەسىرتكى زاتتارىمەن ۇستالعانىن ايتقان. كۇدىكتى ماسەلەنى شەشۋ ءۇشىن زەينەتكەردەن 300 مىڭ تەڭگە تالاپ ەتكەن.
«زەينەتكەر اقشانى كونۆەرتكە سالىپ، ءۇي اۋلاسىندا كورسەتىلگەن جەرگە قويعان. كەيىن كۇدىكتى كونۆەرتتى الىپ، بوي تاسالاعان. ءبىراز ۋاقىتتان كەيىن زەينەتكەر الدانىپ قالعانىن ءتۇسىنىپ، بىردەن پوليتسياعا جۇگىنگەن. پوليتسيا قىزمەتكەرلەرى كۇدىكتىنى ۇستادى. ول الاياقتىق جاساعانىن مويىندادى»، - دەپ اتاپ وتەدى دەپارتامەنتتەن.
ۆەدومستۆونىڭ حابارلاۋىنشا، كۇدىكتىگە قاتىستى ق ر ق ك-نىڭ 190-بابى 1-بولىگى (الاياقتىق) بويىنشا تەرگەۋ جۇرگىزىلىپ جاتىر. سونداي-اق ونىڭ ەلوردا اۋماعىندا وسىنداي قىلمىسقا قاتىسىنىڭ بار- جوعى انىقتالىپ جاتىر.
اۆتور: مارلان جيەمباي