اۋىل ايەلدەرى زەينەتكە شىعۋ جاسىن تومەندەتۋدى سۇرادى
«AMANAT» پارتياسى س ق و فيليالى باسپا ءسوز قىزمەتىنىڭ مالىمەتىنشە، پارلامەنت ءماجىلىسىنىڭ دەپۋتاتى دميتري كولودا اققايىڭ اۋدانى استراحانكا اۋىلىندا تۇرعىندارمەن كەزدەسۋ وتكىزدى.
ماقسات - ەل كونستيتۋتسياسىنا ەنگىزىلەتىن تۇزەتۋلەر جايىندا ايتىپ، الداعى رەفەرەندۋم جونىندە حالىقتىڭ ويىن ءبىلۋ. كەزدەسۋ بارىسىندا تۇرعىندار بەلسەندىلىك تانىتىپ، ماجىلىسمەنگە الەۋمەتتىك كودەكسكە وزگەرىستەر ەنگىزۋگە قاتىستى كوپتەگەن سۇراق قويدى. سولاردىڭ ءبىرى - استراحانكا ەلدى مەكەنىنىڭ تۇرعىنى گۇلميرا قابانبايەۆا ايەلدەردىڭ زەينەتكە شىعۋ جاسىن 63-تەن 58 جاسقا دەيىن تومەندەتۋ كەرەك دەپ ەسەپتەيدى.
«63 جاس ايەل ادامعا كوپ دەپ ويلايمىن. اسىرەسە اۋىلداعى ايەلدەر تەز قارتايادى. بالا تۋادى. ولاردىڭ كۇتىمى بار. دەنساۋلىعىنا بايلانىستى 58 جاس بولۋ كەرەك»، - دەدى گۇلميرا قابانبايەۆا. ءماجىلىس دەپۋتاتىنىڭ ايتۋىنشا، بۇل ماسەلەنى قاراۋ تۋرالى ايەلدەردەن پارلامەنتكە كۇن سايىن ءوتىنىش تۇسەدى. قازىرگى ۋاقىتتا ايلدەردىڭ زەينەتكە شىعۋ جاسىن تومەندەتۋ بويىنشا ارنايى قۇجات ازىرلەنۋدە.
«ءبىز وسى باعىتتا جۇمىس ىستەپ جاتىرمىز. ماسەلە قارالادى. ول ارنايى الەۋمەتتىك كودەكسكە ەنگىزىلەتىن بولادى. قازىر ونى ۇكىمەت جاساپ جاتىر. جىل سوڭىنا دەيىن قۇجات پارلامەنتتىڭ قاراۋىنا ۇسىنىلۋى ءتيىس»، - دەپ اتاپ ءوتتى دميتري كولودا.
ءماجىلىس دەپۋتاتى اۋىل تۇرعىندارىنا 5-ماۋسىمدا وتەتىن بۇكىلحالىقتىق رەفەرەندۋم تۋرالى ەگجەي- تەگجەيلى ايتىپ بەردى. ول تۇرعىنداردى وسى ماڭىزدى شاراعا قاتىسۋعا شاقىردى. دميتري كولودانىڭ ايتۋىنشا، كونستيتۋتسياعا ەنگىزىلەتىن وزگەرىستەر حالىقتىڭ ومىرىنە تىكەلەي قاتىستى جانە ءومىر ءسۇرۋ ساپاسىن جاقسارتۋعا باعىتتالعان. بۇعان دەيىن ق ر پرەمەر-ءمينيسترىنىڭ ورىنباسارى ەرالى توعجانوۆ تا ايەلدەردىڭ زەينەتكە شىعۋ جاسىن تومەندەتۋ ماسەلەسى الەۋمەتتىك كودەكس اياسىندا تالقىلاناتىنىن ايتقان ەدى.
اۆتور: اقەركە داۋرەنبەك قىزى