سولاردىڭ ءبىرى مارجان قاسەنوۆا الماتىداعى №7-قالالىق كلينيكالىق اۋرۋحاناسىندا جۇمىس ىستەيدى. 30 جىلدىق ەڭبەك ءوتىلى بار مەيىربيكەمەن «قازاقپارات» ءتىلشىسى تىلدەسكەن ەدى. مارجان قاسەنوۆا الماتى مەديتسينالىق كوللەدجىن ءتامامداعان.
«1998 -جىلى №7-قالالىق كلينيكالىق اۋرۋحاناعا جۇمىسقا تۇردىم، انەستەزيولوگيا، رەانيماتسيا جانە قارقىندى تەراپيا بولىمشەسىنىڭ نەيروحيرۋرگيا پالاتاسىندا جۇمىس ىستەدىم. رەانيماتسياداعى جۇمىس وتە اۋىر. مۇندا ءومىر مەن ءولىمنىڭ اراسىنداعى ناۋقاستار جاتادى، سولارعا كۇتىم جاسايمىز. كۇن سايىن ءبىز ءارتۇرلى جاراقاتتار مەن اۋرۋلارمەن اۋىراتىن ناۋقاستاردى قابىلدايمىز»، - دەيدى ول.
مارجان قاسەنوۆا 2016 -جىلدان بەرى №7-قالالىق كلينيكالىق اۋرۋحانانىڭ انەستەزيولوگيا، رەانيماتسيا جانە قارقىندى تەراپيا بولىمشەسىنىڭ اعا مەيىربيكەسى مىندەتىن اتقارادى. ونىڭ جالپى ەڭبەك ءوتىلىمى 34 جىل.
«ءبىزدىڭ جۇمىسىمىز وتە جاۋاپتى. توتەنشە جاعدايلار كوپ بولادى. مۇنداي جاعدايلاردا مەيىربيكەلەردىڭ اتقارعان ەڭبەگىن سوزبەن ايتىپ، باعالاۋ مۇمكىن ەمەس. ولاردىڭ دەنساۋلىق ساقتاۋ سالاسىنداعى ءرولى جوعارى. جۇمىستىڭ جوعارى جاۋاپكەرشىلىگىنە، قيىندىعىنا قاراماستان، ولار كاسىبىنە ادال، بۇنداي ىستە تەك ءوز ماماندىعىن جاقسى كورەتىن جاندار عانا جۇرەدى - دەدى مارجان قاسەنوۆا.
بۇگىنگى كۇنى №7-قالالىق كلينيكالىق اۋرۋحانادا 700-دەن استام مەيىربيكە جۇمىس ىستەيدى. ەمدەۋ مەكەمەسىنىڭ انەستەزيولوگيا، رەانيماتسيا جانە قارقىندى تەراپيا بولىمشەسىندە 55 مەيىربيكە جانە 18 مەيىرگەر جۇمىس ىستەيدى.
«قاڭتار وقيعاسى كەزىندە ءبىزدىڭ كلينيكانىڭ مەديتسينالىق قىزمەتكەرلەرى جۇزگە جۋىق ادامنىڭ ءومىرىن ساقتاپ قالدى. وعان مەيىربيكەلەر ۇلكەن ۇلەس قوستى. مەنىڭ ويىمشا، بۇل ءبىزدىڭ پارىزىمىز»، - دەيدى ول.
مەديتسينا سالاسىندا مول تاجىربيە جيناقتاعان كەيىپكەرىمىز ءقازىر بىلگەنىن جاستارعا ۇيرەتۋدە. «مەن ۇزاق جىلدار بويى نەيروحيرۋرگيالىق پالاتادا باس سۇيەك- مي جاراقاتى بار پاتسيەنتتەرمەن جۇمىس ىستەدىم. بۇل ۇلكەن تاجىربيە بولدى. ەندى بىلگەنىمدى جاس ارىپتەستەرىمە ۇيرەتىپ جاتىرمىن. بىزدە ساۋاتتى ماماندار كوپ. ءبىراق تاجىربيە ەشقاشان ارتىق بولمايدى. سوندىقتان ءاربىر كەلگەن جاس ماماندى ۇيرەتەمىن. ولاردىڭ بارلىق باستامالارىن قولدايمىن»، - دەيدى كەيىپكەرىمىز.
ايتا كەتەيىك، مارجان قاسەنوۆا 2008 -جىلى الماتى قالاسى اۋەزوۆ اۋدانىنىڭ ۇزدىك مەيىربيكەسى اتاندى. 2018 -جىلى «مەيىربيكە ءىسى» ماماندىعى بويىنشا ءبىلىمىن جەتىلدىرۋ ءۇشىن جوعارى وقۋ ورنىنا ءتۇسىپ، ونى 2020 -جىلى اياقتادى. سول جىلى ق ر دەنساۋلىق ساقتاۋ مينيسترلىگىنىڭ «دەنساۋلىق ساقتاۋ ىسىنە قوسقان ۇلەسى ءۇشىن» مەدالىمەن ماراپاتتالدى. سونىمەن قاتار، ءۇش ۇلدىڭ اناسى، ۇلگىلى وتباسىنىڭ تىرەگى. ايتۋىنشا، وتباسى وعان بارلىق جاعىنان قولداۋ كورسەتەدى.
«وتباسىم- مەنىڭ تىرەگىم. نەمەرەم بار. جۇمىستان قولىم بوس ۋاقىتتى وتباسىما جانە نەمەرەمە ارنايمىن. مەن ءوز كاسىبىمدى جاقسى كورەمىن جانە ماقتان ەتەمىن. ءبىزدىڭ مىندەتىمىز- ادامدارعا كومەكتەسۋ. مەن ادام جانىنا اراشا بولاتىن دەنساۋلىق سالاسىندا ەڭبەك ەتكەنىم جانە ادامداردىڭ جازىلۋىنا ءوز ۇلەسىمدى قوساتىن مۇمكىندىگىم ءۇشىن قۋانىشتىمىن»، - دەيدى كەيىپكەرىمىز.
اۆتور: الما مۇقانوۆا