شىمكەنت پوليتسياسىنىڭ ءبىرقاتار باسشىسى جازاعا تارتىلدى
بۇل تۋرالى ءۇشىنشى مەگاپوليسكە جۇمىس ساپارىمەن بارعان ەلىمىزدىڭ ىشكى ىستەر ءمينيسترىنىڭ ورىنباسارى مارات قوجايەۆ ايتتى، دەپ حابارلايدى قازاقپارات ءتىلشىسى.
قالالىق پوليتسيانىڭ باسپا ءسوز قىزمەتىنىڭ مالىمەتىنشە، ءتارتىپ ساقشىلارىمەن كەزدەسكەن مارات قوجايەۆ پوليتسيانىڭ جۇمىس اتقارۋى مەن ءتارتىپ جاعدايىنا قاتىستى ءبىرقاتار ماسەلەنى سىنعا الدى. قالالىق پ د باستىعى قايرات دالبەكوۆكە «دەر كەزىندە باقىلاۋعا الماعانى ءۇشىن» ىشكى ىستەر ءمينيسترىنىڭ بۇيرىعىمەن سوگىس جاريالانعاندى. پ د باسشىلىعىن تارتىپتىك جاۋاپكەرشىلىككە تارتۋعا پوليتسيا قىزمەتكەرلەرى جاساعان قىلمىستار مەن قۇقىق بۇزۋشىلىقتار سەبەپ بولدى. ولاردىڭ اراسىندا جەرگىلىكتى پوليتسيا قىزمەتىنىڭ ەكس-باستىعى، روتا كومانديرى جانە پاترۋلدىك پوليتسيا پولكىنىڭ ەكى قىزمەتكەرى جانە اباي اۋداندىق پوليتسيا باسقارماسىنىڭ قىزمەتكەرلەرى بار. جەكە قۇراممەن جۇمىس ىستەۋ مىندەتىنە كىرەتىن كادر اپپاراتىنا قاتىستى دا قاتاڭ شارالار قابىلداناتىن بولادى.
«پرەزيدەنتتىڭ جولداۋىن ىسكە اسىرۋ ماقساتىندا پوليتسيا قاتارىندا دورەكىلىككە، سىبايلاستىققا جانە تامىر-تانىستىققا ورىن جوق. قازىرگى تاڭدا ءبىز ىشكى ىستەر ورگاندارىنىڭ ادال، ءادىل، ەڭبەكقور جانە تازا قىزمەتكەرلەرىن قولدايمىز جانە ولاردىڭ جۇمىسى ىلگەرىلەۋ ءۇشىن جاعداي جاسايمىز. ازاماتتاردىڭ كونستيتۋتسيالىق قۇقىقتارىن ساقتاۋ جانە زاڭ ۇستەمدىگىن ورناتۋ - ءبىزدىڭ باستى مىندەتىمىز»، - دەدى مينيستر ورىنباسارى.
اۆتور: اينۇر اقبايەۆا