بۇل تۋرالى بوستاندىق اۋدانىنىڭ پروكۋراتۋراسىنان ءمالىم ەتتى، حابارلايدى قازاقپارات ءتىلشىسى.
الماتى قالاسى بوستاندىق اۋدانىنىڭ پروكۋراتۋراسى «Astra Consulting Agensy» ج ش س جانە «Alpha Lux Consulting» ج ش س باسشىلارى مەن مەنەدجەرلەرىنە قاتىستى قارجى پيراميداسى تۋرالى قىلمىستىق ءىستى سوتقا جولدادى. ونىڭ قىزمەتى سالىمشىلارعا 600 ملن تەڭگەدەن استام شىعىن كەلتىردى.
«تەرگەۋ بارىسىندا انىقتالعانى، ۇيىمداستىرۋشىلار مەن مەنەدجەرلەر ۇيالى تەلەفوندارعا قوڭىراۋ شالىپ، قارجىلىق ساۋاتتىلىق كۋرستارىنا شاقىرعان. سودان كەيىن ولار سالىم سوماسىنا بايلانىستى ءارتۇرلى پايىزدارمەن 124 سالىمشىنى الداپ، اقشانى سەنىمگەرلىك باسقارۋ تۋرالى كەلىسىمدەر جاساعان. ينۆەستورلارعا سالىم سوماسىنا بايلانىستى جەدەل تولەمدەر بەرۋگە ۋادە ەتكەن. قىلمىستىق ءىس شەڭبەرىندە 6 ادام كۇدىكتى رەتىندە تانىلىپ، ولارعا قاتىستى «كۇزەتپەن ۇستاۋ» تۇرىندەگى بۇلتارتپاۋ شاراسى تاڭدالدى»، - دەپ حابارلادى پروكۋراتۋرادان.
قازىرگى ۋاقىتتا قىلمىستىق ءىس اياقتالىپ، سوتقا جولداندى. پروكۋراتۋرا ورگاندارى ازاماتتارعا جوعارى پايدا تابۋعا ۋادە بەرەتىن ءتۇرلى كاسىپورىندارعا قاراجات سالۋ تۋرالى ۇسىنىستار العان كەزدە اباي بولۋعا شاقىردى.
ەسكە سالايىق، بىلتىر ساۋىردە «Astra Consulting Agency» ج ش س قىزمەتى قارجىلىق پيراميدا رەتىندە تانىلعان بولاتىن.
اۆتور: الما مۇقانوۆا