«بىلتىر تۇتىنۋشىلىق كرەديت 40 پايىزعا ءوستى. وسى ءوسۋ پروبلەماسىمەن قاتار، كرەديتىن وتەي المايتىنداردىڭ دا سانى ارتىپ كەلەدى. سول سەبەپتى ءبىز ءتۇرلى شارالاردى قابىلداپ جاتىرمىز»، - دەدى م. ءابىلقاسىموۆا پارلامەنت ماجىلىسىندە تىلشىلەر ساۋالىنا جاۋاپ بەرە وتىرىپ.
ونىڭ ايتۋىنشا، ەلىمىزدە قارىز جۇكتەمەسى كوەففيتسيەنتى پايدالانىلىپ جاتىر.
«بانكتەر مەن ميكروقارجى ۇيىمدارى نەسيە بەرگەن كەزدە، قارىز الۋشىنىڭ تابىسىن باعالاۋى ءتيىس. نەسيە بويىنشا اي سايىنعى تولەم سوماسى قارىز الاتىن ادامنىڭ اي سايىنعى تابىسىنىڭ 50 پايىزىنان اسپاۋى كەرەك. ەگەر بۇل دەڭگەيدەن اسىپ تۇسسە، وندا بانك نەمەسە نەسيە ۇيىمدارى كرەديت بەرمەۋى ءتيىس. ولار بۇل تالاپتاردى ورىنداماسا، ءبىز قاداعالاۋ ءىس- شارالارىن جۇزەگە اسىرامىز»، - دەدى اگەنتىك باسشىسى.
بۇدان بۇرىن حابارلانعانداي، بۇگىن ءماجىلىس «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سترەستىك اكتيۆتەر نارىعىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماقۇلداندى.
اۆتور: رۋسلان عابباسوۆ