بوكەي حاندىعىنىڭ سول قالپى ساقتالعان كەشەندەرى جاڭارتۋدى تالاپ ەتەدى
باتىس قازاقستان وبلىسىنىڭ حان ورداسى اۋىلى تۋريزمگە سۇرانىپ تۇرعانىمەن ينفراقۇرىلىم كوڭىل كونشىتەر ەمەس. ايماق باسشىسى عالي ەسقاليەۆ ب ا ق وكىلدەرىمەن كەزدەسۋدە بوكەي حاندىعىنىڭ 225 جىلدىعىنا ارنالعان ءىس- شارالار جوسپارى بيىل باستالاتىنىن ايتتى. مەرەيتوي قارساڭىندا ەلدى مەكەندە ۆيزيت ورتالىعى مەن اكىمشىلىك عيمارات سالىنباق. قۇرىلىسقا قاجەتتى قاراجات جەر قويناۋىن پايدالانۋشى كومپانيامەن اراداعى الەۋمەتتىك باعدارلاما ەسەبىنەن قاراستىرىلعان. بۇدان بولەك جەرگىلىكتى ماڭىزى بار اۆتوجول جوندەلىپ جاتىر. ال مينيسترلىكتىڭ 2023-2025 -جىلدارعا ارنالعان بيۋدجەتتىك جوسپارىنا وبلىستاعى تاريحي ەسكەرتكىشتەردى قالپىنا كەلتىرۋ ماقساتىندا 1 ميلليارد تەڭگەگە ءوتىنىش جىبەرىلگەن.
عالي ەسقاليەۆ، وبلىس اكىمى:
- جوبالىق جۇمىستارى ءبىتتى. ەندى بيىلدان باستاپ رەكونسترۋكتسيا، قايتتان جاڭارتۋ جوبالارىن ىسكە اسىرۋىمىز قاجەت. حان ورداسىنىڭ ىشىندەگى ءبىزدىڭ مۇراجايلارىمىزدى، باسقا ەسكى، كونە عيماراتتارىمىزدى قالپىنا كەلتىرۋ نەمەسە قاسىنا جاڭا عيماراتتار سالۋ ۇلكەن جوبا بولادى. ۇلكەن جولدان حان ورداسىنا اپاراتىن 24 شاقىرىمدى بىلتىر باستاپ كەتتىك. ونى بيىل ءبىتىرۋىمىز كەرەك.