رۋسلان جاقسىلىقوۆ انكاراعا قازاقستان پرەزيدەنتى قاسىم- جومارت توقايەۆتىڭ دەلەگاتسياسى قۇرامىندا كەلدى. مارتەبەلى مەيماننىڭ قۇرمەتىنە تۇركيانىڭ قورعانىس ۆەدومستۆوسى عيماراتىنىڭ جانىندا قۇرمەتتى قاراۋىل ساپقا تۇردى.
مينيسترلەر باۋىرلاس ەكى مەملەكەتتىڭ قورعانىس ىنتىماقتاستىعىن تەرەڭدەتۋ جولدارىن، سونداي- اق وڭىرلىك قاۋىپسىزدىك ماسەلەلەرىن تالقىلادى. قورعانىس ۆەدومستۆولارىنىڭ باسشىلارى تۇركيا مەن قازاقستان حالىقتارىن بايلانىستىراتىن تاريحي تۇستاردىڭ بار ەكەنىن اتاپ ءوتتى. تۇركيا ءمينيسترى انكارا مەن نۇر- سۇلتان اراسىنداعى ستراتەگيالىق سەرىكتەستىك تۋرالى كەلىسىمدى ەكىجاقتى بايلانىستاردى كەڭەيتۋدەگى ماڭىزدى كەزەڭ دەپ اتادى.
اكار تۇركيا- قازاقستان قورعانىس بايلانىستارىن، ونىڭ ىشىندە بىرلەسكەن اسكەري وقۋ- جاتتىعۋلار وتكىزۋ جانە قورعانىس ونەركاسىبى سالاسىنداعى بايلانىستاردى كەڭەيتۋدىڭ ماڭىزدىلىعىن اتاپ ءوتتى.
ەسكە سالساق، قاسىم- جومارت توقايەۆتىڭ تۇركيا رەسپۋبليكاسىنا مەملەكەتتىك ساپارى تۇركيانىڭ نەگىزىن قالاۋشى ءارى تۇڭعىش پرەزيدەنتى مۇستافا كەمال اتاتۇرىكتىڭ رۋحىنا تاعزىم ەتۋدەن باستالدى.
اۆتور: اقبوپە ءابدراسۋل