ءتاج ماحال كەسەنەسىن اقساق تەمىردىڭ ۇرپاعى جاقان شاح 13 بالا تۋىپ، 14-بالادان قايتىس بولعان توقالى مۇمتاز ماحالعا ارناپ سالدىرعان. كەيىننەن قۇسادان قايتىس بولعان شاحتىڭ ءوزى دە سۇيىكتى توقالىنىڭ قاسىنا جەرلەنگەن. 1630-جىلى باستالعان كەسەنەنىڭ قۇرىلىسى 22 جىلعا سوزىلعان. «ولمەس ماحاببات» نىشانى بولىپ سانالاتىن ءتاج ماحال - الەمدەگى جەتى كەرەمەتتىڭ ءبىرى. ءتورت قۇبىلاسىندا ءتورت مينارەتى، بيىكتىگى 74 مەترلىك بەس كۇمبەزى بار اق ءمارماردان سالىنعان مازاردىڭ قۇرىلىسىنا ورتا ازيا، پارسى، تاياۋ شىعىس ەلدەرىنەن 20 مىڭ زەرگەر-ۇستا جۇمىلدىرىلعان.
ءتاج ماحالدىڭ قۇبىلاسىندا قىزىل قۇمنان سالىنعان مەشىت، شىعىسىندا قىزمەتكەرلەر جاتاتىن تۋرا سونىڭ كوشىرمەسى سالىنعان. مازارعا سيممەتريامەن سالىنعان ەكى ۇلكەن قاقپا ارقىلى كىرەدى. ادەمى باسسەيندەرمەن كومكەرىلگەن ءتاج ماحال - ارحيتەكتۋرانىڭ شىڭى.
مازار تۇتاستاي اق ءمارماردان تۇرعىزىلعان. قابىرعالارىنداعى كەسەك ءمارمارداعى ۇساق، اسا شەبەرلىكپەن كەسكىندەلگەن ورتا ازيالىق ويۋ-ورنەكتەر قولدان قاشالىپ جاسالعان. تاڭ شاپاعىمەن قىزعىلت تۇسكە، كۇندىز اق شاڭقان، تۇنگى اي ساۋلەسىمەن كۇمىس تۇسكە بويالاتىن ءمولدىر اق ءمارماردى اگرادان 300 شاقىرىم جەردەن الدىرتقان ەكەن. ەڭ كەرەمەتى كىرە بەرىستەگى قۇران سۇرەلەرى قارا اقىقتان، ال قابىرعالارداعى اشەكەيلەر مەن گۇلدەر قىزعىلت اقىق، مالاحيت، جاقۇت، نيفريتتەن جاسالىپ، ءمارمار تاستىڭ ىشىنە ويىپ سالىنعان. الەمدەگى ەڭ كەسەك الماس تاس (بريلليانت) «كوح-ي-نۇر» وسى مازاردا تۇرعان، كەيىننەن اعىلشىندار ەلدەرىنە الىپ كەتكەن. قازىر ول لوندوندا ساقتاۋلى.
ءتاج ماحالدىڭ ىرگەسىن جۋىپ جاتقان جامۋنا وزەنىنىڭ ارعى بەتىندە قارا ءمارماردان جاسالعان ىرگەتاس جاتىر. جاقان شاحتىڭ جوسپارى بويىنشا ونىڭ ءوزى سول جەردەن قارا ءمارماردان سالىناتىن تۇپ-تۋرا ءتاج ماحالدىڭ كوشىرمەسىنە جەرلەنۋى ءتيىس بولاتىن.
جامۋنا وزەنىنىڭ ەكى جاعاسىندا جاتقان قوس مازاردى جالعاستىراتىن كوپىر سالىنۋى ءتيىس ەدى. الايدا سىرتتان كەلەتىن شاپقىنشىلىقتان قاجىعان مەملەكەتتىڭ قازىناسى تاعى ءبىر قىمبات عيماراتتىڭ قۇرىلىسىن كوتەرە المايتىن بولدى. 1658-جىلى جاقان شاحتى ۇلى اۋرانگزەب ورنىنان الىپ، قىزىل بەكىنىسكە قاماپ قويدى. توعىز جىل قاماۋدا وتىرعان جاقان شاحتى قايتىس بولعاننان كەيىن توقالىنىڭ جانىنا اپارىپ جەرلەدى.
massaget.kz