قىلمىستى اشۋ ءۇشىن قىلمىسكەر سەكىلدى ويلاي ءبىلۋ كەرەك - كريميناليست
7-مامىر - وتان قورعاۋشى كۇنىندە وسكەمەن قالالىق پ ب كريميناليستيكا ءبولىمى باستىعىنىڭ ورىنباسارى اقىلبەك مۇحامەتقاليەۆپەن سۇحبات قۇرعان ەدىك.
اقىلبەك مۇحامەتقاليەۆ كۇرشىم اۋدانى سارىولەڭ اۋىلىندا دۇنيەگە كەلگەن. وسكەمەندەگى قازاقستان- امەريكاندىق ەركىن ۋنيۆەرسيتەتىن 2005 -جىلى «زاڭگەر» ماماندىعى بويىنشا ءتامامدادى. ديپلوم العان سوڭ اسكەرگە اتتانعان.
- وتان الدىنداعى بورىشىمدى وتەپ كەلگەننەن كەيىن گلۋبوكوە اۋداندىق پوليتسيا بولىمىنە كريميناليست بولىپ جۇمىسقا تۇردىم. كريميناليستىڭ جۇمىسى قاۋىرت، جاۋاپكەرشىلىگى اۋىر. كۇن- تۇنگە، سەنبى، جەكسەنبىگە قارامايمىز. قىلمىس بولعان جەرگە ءبىرىنشى بولىپ بارامىز. جان- جاقتى مۇقيات تەكسەرىپ، ايعاق زاتتاردى جينايمىز، - دەيدى ول.
2009 -جىلى وسكەمەنگە جۇمىسقا اۋىسقان. پوليتسيا باسقارماسىنىڭ كريميناليستيكا بولىمىندە ەڭبەك ەتىپ، ءوزىن جاقسى قىرىنان كورسەتە ءبىلدى. سونىڭ ارقاسىندا 7 جىلدان كەيىن ءبولىم باستىعىنىڭ ورىنباسارى لاۋازىمىنا كوتەرىلدى.
- جۇمىس بارىسىندا ءارتۇرلى قىلمىستاردىڭ اشىلۋىنا سەپتىگىمىز ءتيدى. ماسەلەن، بىردە ابلاكەتكا كەنتىندە كىسى ءولىمى بولعان پاتەرگە باردىم. قاسكوي زەينەتكەردى پىشاقتاپ ءولتىرىپ كەتىپتى. بولمە ءىشىن مۇقيات تەكسەردىك. ەسىكتەن قىلمىسكەردىڭ ساۋساق ءىزىن الىپ، پاپيلون جۇيەسى ارقىلى ىزدەستىردىك. جۇيە بۇعان ۇقسايتىن بىرنەشە ادامنىڭ ساۋساق ءىزىن كورسەتتى. سودان كەيىن ساراپتاما جاساپ، ناقتى كىمنىڭ ءىزى ەكەنىن انىقتادىم. وسىلايشا، قىلمىسكەردىڭ كىم ەكەنى بەلگىلى بولدى. مۇنداي وقيعالار كوپ. ۇرلىق جاساعاندار دا ءجيى قولعا ءتۇسىپ جاتادى، - دەيدى اقىلبەك مۇحامەتقاليەۆ.
دەسە دە، قازىر زاڭدى ەلەمەيتىندەر ساۋساق ءىزى ارقىلى تىم سيرەك ۇستالاتىن كورىنەدى. جاۋاپقا تارتىلماس ءۇشىن قولعاپ كيىپ، ءار قيمىلدارىن الدىن الا ويلاستىرىپ جاسايدى. ءبىراق، كريميناليستيكا سالاسى دا ءبىر ورىندا تۇرعان جوق. قىلمىس جاساعانداردىڭ كىم ەكەنىن انىقتاۋدىڭ امال-تاسىلدەرى كوبەيىپ كەلەدى.
- قازىر بولىمدە 26 كريميناليست بار. مامان تاپشى ەمەس. ۇجىمىمىزدىڭ بەرەكە- بىرلىگى جاراسقان. قاتارىمىزداعى ءار ازامات ءوز سالاسىنا بەرىلگەن. مەنىڭشە، ەكىنىڭ ءبىرى كريميناليست بولا المايدى. قىلمىستى اشۋ ءۇشىن قىلمىسكەر سەكىلدى ويلاي ءبىلۋ كەرەك. ونىڭ قالاي كەلىپ، قالاي كەتكەنىن انىقتاۋ، دالەلدەمەلەردى جيناۋ شىدامدىلىق پەن ەپتىلىكتى قاجەت ەتەدى، - دەيدى ءتىسقاققان كريميناليست.
كەيىپكەرىمىز ومىرلىك جارىمەن 3 بالا تاربيەلەپ وتىر. ۇلكەنى 11-دە، كەنجەسى 3 جاستا.
ءسوز سوڭىندا ول قازاقستاننىڭ ەر ازاماتتارىن مەرەكەلەرىمەن قۇتتىقتادى.
- ەڭ باستىسى، دەنساۋلىقتارىڭىز مىقتى بولسىن! ادامگەرشىلىككە ءتان اسىل قاسيەتتەردى ساقتاپ، ەل ءۇشىن ەڭبەك ەتەيىك. بالا- شاعامىز امان بولىپ، وتانىمىز وركەندەي بەرسىن! - دەدى اقىلبەك مۇحامەتقاليەۆ.