قىرعىز- وزبەك شەكاراسىنداعى اتىسقا ەكى ەل وكىلدەرى تۇسىنىكتەمە بەردى

تاشكەنت. بىشكەك - قازاقپارات - قىرعىزستان مەن وزبەكستان وكىلدەرى ەكى ەل اراسىنداعى شەكارادا بولعان جاعدايعا تۇسىنىكتەمە بەردى، دەپ حابارلايدى قازاقپارات.

قىرعىز شەكارا قىزمەتىنىڭ حابارلاۋىنشا، 5-مامىر كۇنى اكتوم اۋىلىندا 3 قىرعىز ازاماتىنا وزبەكستاندىق شەكاراشىلار قارۋ قولدانعان. ءۇش ازامات تا جاراقات الىپ، اۋرۋحاناعا جەتكىزىلگەن.

ال وزبەكستان مەملەكەتتىك قاۋىپسىزدىك قىزمەتى شەكارا اسكەرلەرى قىرعىزستانمەن شەكاراداعى جاعدايعا بايلانىستى رەسمي مالىمدەمە جاسادى.

«2022 -جىلعى 5-مامىردا نامانگان وبلىسىنىڭ «يانگيكۋرگان» اۋدانىنداعى اكتوم اۋىلى ارقىلى وتەتىن وزبەك- قىرعىز مەملەكەتتىك شەكاراسىندا، وزبەكستان شەكاراشىلارى بەلگىسىز ءبىر توپتىڭ وزبەكستاننان قىرعىزستانعا ءىرى كولەمدەگى تاۋاردى الىپ ءوتۋىن بايقاپ، بۇل زاڭ بۇزۋشىلىقتىڭ الدىن الۋ شارالارى قولعا الىندى.

مەملەكەتتىك شەكارانى بۇزۋشىلاردى شەكاراشىلار ۇستاۋ كەزىندە ءبىر توپ بۇزۋشىلار اسكەريلەرگە قارسىلىق كورسەتىپ، كۇش قولدانعان جانە دەنە جاراقاتىن سالىپ، قارۋدى تارتىپ الۋعا ارەكەت ەتكەن. بۇل جاعدايدا اسكەري قىزمەتشىلەر زاڭدا بەلگىلەنگەن تارتىپپەن قارۋ قولدانۋعا ءماجبۇر بولعان. ونىڭ سالدارىنان 3 ادام جارالانىپ، ولاردى سەرىكتەرى قىرعىزستانعا الىپ كەتكەن. وقيعانىڭ ءمان-جايىن انىقتاۋ ءۇشىن 5-مامىردا وزبەكستان مەن قىرعىزستان شەكاراشىلارى اراسىندا كەزدەسۋ ءوتتى. تەكسەرۋ جۇمىستارى جۇرگىزىپ جاتىر»، - دەلىنگەن وزبەكستاننىڭ رەسمي ورگانى تاراتقان حابارلامادا.

قازىرگى كەزدە ەكى تاراپ تا جاعدايدى انىقتاپ جاتىر، شەكاراداعى جاعداي تۇراقتى ەكەنى ايتىلۋدا.