قازاقستاندا قۇجاتتاردى جەتكىزۋدىڭ جاڭا ءتۇرى پايدا بولادى

نۇر-سۇلتان. قازاقپارات - بىلتىردان باستاپ قازاقستاندىقتار ءۇشىن قۇجاتتى جەتكىزۋ قىزمەتى قولجەتىمدى ەدى، ەندى ونىڭ اياسى كەڭەيە تۇسپەك.

ول تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما ءتوراعاسى سۇيەنىش ءابدىلدين ايتىپ بەردى، دەپ حابارلايدى قازاقپارات ءتىلشىسى.

«ءبىز «تسون» اتتى موبيلدى قوسىمشا ازىرلەدىك. قوسىمشانى AppStore جانە PlayMarket پلاتفورمالارىنان جۇكتەۋگە بولادى. ول جەردە ازاماتتارعا 13 مەملەكەتتىك قىزمەت ءتۇرى قولجەتىمدى. ول ءۇشىن ح ق و وپەراتورىمەن بەينەبايلانىس ورناتسا بولعانى. ءجيى قولداناتىن قىزمەتتەردىڭ قاتارىندا قايتا كۋالىك بەرۋ، تۇرعىلىقتى مەكەنجاي بويىنشا تىركەۋ جانە تەحنيكالىق ءتولقۇجاتتىڭ كوشىرمەسىن جاساتۋ بار. سول سياقتى اتالعان موبيلدى قوسىمشانىڭ كومەگىمەن جاقىن ماڭداعى ح ق و- نى تاۋىپ، الدىن الا كەزەككە تۇرۋعا بولادى»، - دەدى سۇيەنىش ءابدىلدين و ك ق- تە وتكەن بريفينگتە.

ونىڭ ايتۋىنشا، بۇگىندە «تسون» اتتى موبيلدى قوسىمشانى 32 مىڭنان استام قازاقستاندىق قولدانىپ جاتىر. سونداي-اق، سپيكەر بريفينگ بارىسىندا دايىن قۇجاتتاردى جەتكىزۋ قىزمەتى تۋرالى ايتىپ بەردى.

«وتكەن جىلدان باستاپ ءبىز دايىن قۇجاتتاردى جەتكىزۋ قىزمەتىن ىسكە قوستىق. بۇگىندە اتالعان قىزمەت ەلىمىزدىڭ 16 قالاسىندا قولجەتىمدى. 2021-جىلدىڭ 1- ساۋىرىنەن باستاپ وسى كۇنگە دەيىن 6 مىڭنان استام قۇجات كليەنتتەردىڭ ۇيىنە جەتكىزىلدى. ونى قولدانۋ ءادىسى وڭاي. قۇجات دايىن بولعاندا كليەنتتىڭ تەلەفون نومىرىنە SMS حابارلاما كەلەدى. حابارلاماداعى سىلتەمە ارقىلى ءوتىپ، 970 تەڭگە تولەۋىڭىز كەرەك. تولەم قابىلدانعان سوڭ قۇجات سول كۇنى سىزگە جەتكىزىلەدى. قازىرگى ۋاقىتتا بۇل قىزمەت ءتۇرىن جەتىلدىرۋ جاعىن قاراستىرىپ جاتىرمىز. ياعني قۇجاتتى باسقا دا پلاتفورمالار ارقىلى جەتكىزۋ. مىسالى، Yandex ارقىلى جەتكىزۋ مۇمكىندىگى»، - دەيدى ول.

بۇعان دەيىن سۇيەنىش ءابدىلدين ەلىمىزدە اۆتومەكتەپتەر قىزمەتىنە جاۋاپكەرشىلىكتىڭ قاتاڭداي تۇسەتىنىن ايتتى.