قازاق تىلىنە قاتىستى دەپۋتاتتىق ساۋالىم الەۋمەتتىك جەلىدە تارالعاندا بۇرمالانعان - قازىبەك يسا

نۇر-سۇلتان. قازاقپارات - ءماجىلىس دەپۋتاتى قازىبەك يسا مەملەكەتتىك تىلگە قاتىستى دەپۋتاتتىق ساۋالىنا تۇسىنىك بەردى، دەپ حابارلايدى قازاقپارات ءتىلشىسى.

«بۇل ماسەلە دەپۋتاتتىق ساۋالدان كەيىن ءۇش كۇننەن سوڭ الەۋمەتتىك جەلىدە كەڭىنەن تالقىلانىپ كەتتى. ءبىرشاما بۇرمالانىپ كەتكەن. سول كەزدە جاۋاپ بەرىپ، ءتۇسىندىرىپ جازعان ەدىم.

اتاپ ايتقاندا، ول پارلامەنتتە داۋىسقا تۇسكەن ەشقانداي زاڭ ەمەس، ياعني «اق جول» فراكسياسىنىڭ (27-ساۋىردەگى) دەپۋتاتتىق ساۋالىن جاريالاعان ەدىم. ساۋال جاريالاعاندا بارلىعى مەنى قولداپ، دەپۋتاتتار ءوز قالاۋىمەن قوسىلدى. قوسىلعانداردىڭ ءتىزىمى دەپۋتاتتىق ساۋالدىڭ سوڭىندا جازىلعان»، - دەدى ق. يسا ءماجىلىستىڭ جالپى وتىرىسىنان كەيىن تىلشىلەر ساۋالىنا جاۋاپ بەرىپ.

ءوز كەزەگىندە دەپۋتات ازات پەرۋاشەۆ ماجىلىستە وزەكتى تاقىرىپ بويىنشا دەپۋتاتتىق ساۋال جاريالانعان كەزدە، كەز كەلگەن دەپۋتات ەشبىر شەكتەۋسىز ساۋالدى قولداي الاتىنىن ەسكە سالعان.

«قوعامدا ساۋالدى قولداعان دەپۋتاتتاردى جاقتاپ، قولداماعانداردى سىنعا الا باستادى. نەگىزى، باسقا فراكسيا دەپۋتاتتارىنىڭ ساۋالىن قولداۋعا ەشكىم مىندەتتى ەمەس. وعان قاراماستان، باسقا فراكسيالارداعى كەيبىر ارىپتەستەرىمىز ءوزىنىڭ ازاماتتىق ۇستانىمىن كورسەتىپ، بۇل ساۋالىمىزدى قولداعانىنا العىس ايتامىز»، - دەدى ا. پەرۋاشەۆ.

اۆتور: رۋسلان عابباسوۆ