ەلىمىزدە دوللارعا سۇرانىس ازايدى

نۇر- سۇلتان. قازاقپارات - ۇلتتىق بانك ساۋىردە ينتەرۆەنتسيا جۇرگىزگەن جوق. سونداي- اق ءبىرىڭعاي جيناقتاۋشى زەينەتاقى قورى نەمەسە وزگە دە اكتيۆتەردى شەتەل ۆاليۋتاسىنا ساتۋ، ساتىپ الۋ بويىنشا وپەراتسيا جاسامادى.

دەسە دە، تەڭگە دوللارعا شاققاندا 4,6 پروتسەنتكە نىعايىپ، ورتاشا 445 دوللار شاماسىندا ساۋدالاندى. ورتالىق بانكتىڭ مالىمەتىنە قاراعاندا ساۋىردە دوللارعا سۇرانىس ازايعان. ءبىر كۇندىك ساۋدا 179 ميلليون دوللاردان 92 ميلليون دوللارعا دەيىن ازايدى. سونداي- اق تەڭگەنىڭ نىعايۋىنا ۇكىمەتكە قاراستى كومپانيالاردىڭ شەتەل ۆاليۋتاسىندا تاپقان كىرىسىنىڭ ءبىر بولىگىن ىشكى نارىققا ساتۋى وڭ اسەر ەتكەن. بۇل كومپانيالار نارىققا 253 ميلليون دوللارداي شىعارعان.

جىلدىڭ ءبىرىنشى توقسانىندا ەلدىڭ تولەم بالانسى پروفيتسيتپەن قورىتىندىلاندى. ياعني قازىناعا قوسىمشا 2,2 ميلليارد دوللار تۇسكەن. سالىستىرمالى تۇردە ايتساق، بىلتىر ءبىرىنشى توقساندا كەرىسىنشە 1,6 ميلليارد دوللار كەم بولعان ەدى. وسىلايشا رەسپۋبليكانىڭ تولەم قابىلەتى 2020 -جىلدان بەرى العاش رەت پروفيتسيتكە شىقتى.

سونداي- اق بيىل شەتەلدەن ساتىپ العانىمىزدان كورى ساتقانىمىز كوبەيدى. قاڭتار مەن ناۋرىز ارالىعىندا ءبىزدىڭ ەل وزگە مەملەكەتكە 19 ميلليارد دوللارعا تاۋار ەكسپورتتاپ، 9,1 ميلليارد دوللارعا يمپورت جاسادى. مۇندا دا ايىرماشىلىق 9,9 ميلليارد دوللار. وتكەن جىلدىڭ سايكەس كەزەڭىمەن سالىستىرعاندا ءۇش ەسەدەي كوپ. ۇلتتىق بانكتىڭ مالىمەتىنە قاراعاندا تولەم بالانسىندا تابىستىڭ ارتۋىنا الەمدە شيكىزاتتىڭ قىمباتتاۋى اسەر ەتتى. اسىرەسە قازاقستان نەگىزگى ەكسپورتتىق تاۋارى مۇناي ءبىرىنشى توقساندا 38 پروتسەنتكە قىمباتتادى. وسىلايشا كىرىس كوبەيگەن.

رەسەيدە دە جاعداي وسىعان ۇقساس. كورشى ەلدىڭ ورتالىق بانكىنىڭ بولجامى بويىنشا مۇندا پروفيتسيت 145 ميلليارد دوللارعا جەتىپ، رەكورد جاڭارتۋى ىقتيمال. ويتكەنى سانكسياعا بايلانىستى رەسەيگە كەلەتىن يمپورت تاۋارلار كۇرت ازايىپ كەتتى. ەسەسىنە شيكىزات ءالى ەكسپورتتالىپ جاتىر.

www.24.kz